16 жніўня, Мінск /Алена Прус - БЕЛТА/. Нацыянальнай праграмай дэмаграфічнай бяспекі Рэспублікі Беларусь на 2011-2015 гады прадугледжана забяспечыць павелічэнне чаканай працягласці жыцця пры нараджэнні да 72-73 гадоў, зніжэнне каэфіцыента агульнай смяротнасці насельніцтва да 12,5-13,0 на 1000 чалавек, у тым ліку працаздольнага ўзросту - да 5,0 на 1000 чалавек. Аб гэтым паведаміў сёння на прэс-канферэнцыі першы намеснік міністра працы і сацыяльнай абароны Пётр Грушнік, перадае карэспандэнт БЕЛТА. Па прагнозе, пры існуючых тэндэнцыях да 2030 года на 1000 чалавек працаздольнага ўзросту будзе прыпадаць 841 чалавек у нетрудаздольным узросце супраць 693 чалавек у 2010-м. Такім чынам, падкрэсліў Пётр Грушнік, павялічваецца нагрузка на эканамічна актыўнае насельніцтва, сістэму аховы здароўя і сацыяльнай абароны. "Значныя страты працоўнага патэнцыялу могуць прывесці да павелічэння дэфіцыту працоўных рэсурсаў, стрымлівання тэмпаў інавацыйнага развіцця эканомікі, тэрытарыяльнага дысбалансу, - адзначыў прадстаўнік міністэрства. - Таму ва ўмовах дэпапуляцыі перад намі стаіць звышзадача - у бліжэйшыя гады спыніць змяншэнне насельніцтва". На яго думку, умацаванне інстытута сям'і, павышэнне ўзроўню нараджальнасці, безумоўна, уплывае на паляпшэнне дэмаграфічнай сітуацыі, але не кардынальна. Адным з вызначальных фактараў дэпапуляцыі з'яўляецца высокі ўзровень смяротнасці насельніцтва, які, на жаль, мае тэндэнцыю да нарастання. Гэты паказчык уносіць значны ўклад у нізкую працягласць жыцця. У Беларусі мужчыны жывуць на 11-15 гадоў, а жанчыны на 5-10 гадоў менш, чым у развітых краінах свету. Сярэдняя працягласць жыцця мужчын у Беларусі складае 64 гады, жанчын - 76 гадоў.