У восеньска-зімовы перыяд штогод пачынаецца ўздым захворвання на вострыя рэспіраторныя інфекцыі. Як правіла, сімптомы многіх рэспіраторных інфекцый падобныя: насмарк, чханне, павышаная тэмпература, дрыжыкі, ламота ў суставах, можа далучыцца кашаль. Распаўсюджванне рэспіраторных вірусаў часта адбываецца ад інфікаваных людзей да здаровых пры кашлі, чханні. Найбольш небяспечным з усіх рэспіраторных інфекцый з'яўляецца грып.
Грып можа стаць прычынай абвастрэння наяўных хранічных захворванняў. Акрамя гэтага, грып мае шырокі спіс магчымых ускладненняў: лёгкавыя ўскладненні (пнеўманія, бранхіт), пнеўманія з'яўляецца прычынай большасці смяротных выпадкаў ад грыпу; ускладненні з боку верхніх дыхальных шляхоў і ЛОР-органаў (вотыт, сінусіт, рыніт, трахеіт); з боку сардэчна-сасудзістай сістэмы (міякардыт, перыкардыт); з боку нервовай сістэмы (менінгіт, менінгаэнцэфаліт, энцэфаліт, неўралгіі, палірадзікуланэўрыты).
Каб пазбегнуць магчымых ускладненняў, важна своечасова праводзіць прафілактыку і правільна лячыць само захворванне.
Пацыенту пры першых сімптомах трэба застацца дома, каб не толькі не заразіць навакольных, але і своечасова заняцца лячэннем, для чаго неабходна неадкладна звярнуцца да ўрача.
Для правільнага лячэння неабходна строга выконваць усе рэкамендацыі лекара і своечасова прымаць лекі. Пры кашлі і чханні хворы павінен прыкрываць рот і нос хусткай або сурвэткай. Варта максімальна абмежаваць кантакт з хворым на грып, а пры доглядзе за ім выкарыстоўваць медыцынскую маску. Памяшканне, дзе знаходзіцца хворы, неабходна рэгулярна праветрываць і як мага часцей праводзіць там вільготную ўборку, пажадана з прымяненнем дэзінфікуючых сродкаў.
Згодна з рэкамендацыяй Сусветнай арганізацыі аховы здароўя, найбольш эфектыўным сродкам супраць грыпу з'яўляецца вакцынацыя, бо менавіта вакцына забяспечвае абарону ад тых відаў віруса грыпу, якія з'яўляюцца найбольш актуальнымі ў дадзеным эпідэміялагічным сезоне і ўваходзяць у яе склад.
Зрабіўшы прышчэпку ад грыпу, вы абараняеце свой арганізм ад атакі найбольш небяспечных вірусаў — вірусаў грыпу, але застаецца яшчэ больш за 200 відаў вірусаў, якія менш небяспечныя для чалавека, але таксама могуць стаць прычынай захворвання на вострыя рэспіраторныя інфекцыі. Таму ў перыяд эпідэмічнага ўздыму захворвання на ВРВІ і грып рэкамендуецца прымаць меры неспецыфічнай прафілактыкі:
скараціце час знаходжання ў месцах масавага збору людзей і грамадскім транспарце;
карыстайцеся маскай у месцах збору людзей;
пазбягайце цесных кантактаў з людзьмі, якія маюць прыкметы захворвання, напрыклад, чхаюць або кашляюць;
рэгулярна старанна мыйце рукі з мылам, асабліва пасля вуліцы і грамадскага транспарту;
прамывайце поласць носа, асабліва пасля вуліцы і грамадскага транспарту;
рэгулярна рабіце вільготную уборку і праветрывайце памяшканне, у якім знаходзіцеся;
ешце як мага больш прадуктаў, якія змяшчаюць вітамін С (журавіны, брусніцы, цытрына і інш.).
вядзіце здаровы лад жыцця: правільнае харчаванне, рэжым працы і адпачынку спрыяюць умацаванню імунітэту.
Урач-эпідэміёлаг Лепельскага раённага ЦГіЭ Наталля Паборцава