23 лістапада, Мінск /Таццяна Чумакова - БЕЛТА/. Рэспубліканская праграма развіцця малочнай галіны ў 2010-2015 гадах зацверджана ў Беларусі. Адпаведнае рашэнне змяшчаецца ў пастанове Савета Міністраў №1678, паведамілі БЕЛТА ў Апараце Саўміна. "Мэта праграмы - павялічыць валавую вытворчасць малака ў 2015 годзе да 10 млн.т", - адзначыў намеснік міністра сельскай гаспадаркі і харчавання - дырэктар дэпартамента па хлебапрадуктах Васіль Седзін, каментуючы пастанову. У мінулым годзе ў Беларусі было выраблена каля 5,6 млн.т малака. Большую частку дадатковых аб'ёмаў малака, якія будуць атрыманы падчас рэалізацыі праграмы, плануецца ў выглядзе малочных прадуктаў пастаўляць на экспарт. Намеснік міністра падкрэсліў, што праграма накіравана на павелічэнне эканамічнай эфектыўнасці малочнай галіны. Стаіць задача павысіць канкурэнтаздольнасць прадукцыі. "У Беларусі шмат ферм, якія працуюць у старых прыстасаваных памяшканнях, таму запланавана будаўніцтва новых малочна-таварных ферм з прымяненнем сучасных тэхналогій, а таксама рэканструкцыя існуючых", - сказаў ён. У 2009-2010 гадах пабудавана і ўведзена ў строй 118 малочна-таварных ферм. Згодна з пастановай, у рэалізацыю праграмы плануецца ўкласці Br33 трлн. 792,1 млрд., у тым ліку ў будаўніцтва ферм - Br25 трлн. 46 млрд. Астатнія сродкі пойдуць на рэканструкцыю і мадэрнізацыю ферм, памяшканняў для ўтрымання моладзі буйной рагатай жывёлы, а таксама на ўзвядзенне, рэканструкцыю і мадэрнізацыю малочнаперапрацоўчых арганізацый. Для фінансавання праграмы плануецца прыцягнуць крэдытныя рэсурсы банкаў, у тым ліку сродкі замежных крэдытных ліній. Перад малочнай галіной Беларусі стаіць задача павялічыць колькасць кароў у 2015 годзе да 1,6 млн. галоў (на 21% больш у параўнанні з 2010 годам). Пастаўкі малочнай сыравіны перапрацоўчым арганізацыям узрастуць да 9 млн.т (на 74,7%). Плануецца знізіць сезоннасць вытворчасці малака і яго паставак на перапрацоўчыя прадпрыемствы. Колебанні паміж мінімальнай і максімальнай месячнай вытворчасцю ў 2015 годзе павінны скласці не больш за 20%. Намечана пабудаваць 875 малочна-таварных ферм. У ходзе будаўніцтва, рэканструкцыі і мадэрнізацыі ферм прадугледжваецца іх камплектацыя айчынным абсталяваннем. За час рэалізацыі праграмы гаспадаркам будзе пастаўлена звыш 800 даільных залаў. Для малочнаперапрацоўчых арганізацый плануецца закупіць імпартнага абсталявання на 325 млн. еўра.