9 лістапада, Віцебск /Дыяна Курыла - БЕЛТА/. Праатамная лабараторыя ствараецца ў Віцебску, паведаміў карэспандэнту БЕЛТА начальнік упраўлення аховы здароўя Віцебскага аблвыканкама Юрый Дзеркач. У лабараторыі будуць праводзіцца даследаванні, якія дазволяць выявіць схільнасць арганізма да тых ці іншых захворванняў, устанавіць сувязь паміж генетычнымі палімарфізмамі, наборам бялкоў крыві і пачаткам або развіццём хваробы. У прыватнасці, ужо на першым этапе работы лабараторыі можна будзе праводзіць дыягностыку ракавых захворванняў малочнай залозы і прастаты, тым самым выяўляць захворванні, якія не паддаюцца распазнаванню іншымі метадамі, на самых ранніх этапах. Выкарыстоўваючы вынікі малекулярна-генетычных даследаванняў, лекар можа персаналізаваць лячэнне: прызначаць прэпараты зыходзячы з індывідуальных асаблівасцей арганізма. Аднак толькі медыцынскім аспектам дзейнасць гэтай лабараторыі не будзе абмяжоўвацца, бо прадметам даследавання можа быць любая жывая матэрыя. Таму лабараторыя атрымае статус міжгаліновай. У цяперашні час праводзіцца конкурс на закупку асноўнай часткі абсталявання. Як падкрэсліў Юрый Дзеркач, біяінфарматыка, геноміка і праатаміка - гэта навукі аб жыцці, якія вызначаюць медыцыну XXI стагоддзя. Мяркуецца, што віцебская праатамная лабараторыя ўвойдзе ў склад шматфункцыянальнага навукова-тэхналагічнага парку "Белбіяград", які будзе размешчаны ў трох абласцях - Мінскай, Віцебскай, Магілёўскай - для ажыццяўлення яго рэзідэнтамі інавацыйнай дзейнасці шляхам рэалізацыі інавацыйных праектаў у сферы фармацэўтыкі, нана-, біятэхналогій і нана-, мікрасістэмнай тэхнікі. У рэгіянальнай індустрыяльнай зоне "Віцебск" будуць размяшчацца рэзідэнты, якія ажыццяўляюць вытворчую дзейнасць у галіне фармацэўтыкі і біятэхналогіі ў медыцыне.-0-

БЕЛТА