Прагучалі апошнія званкі для выпускнікоў Лепельшчыны

На Лепельшчыне ў школах прагучалі апошнія званкі для выпускнікоў, якія адкрылі ім дарогу ў дарослае жыццё.

Накіроўваемся ў СШ 1 горада Лепеля. Урачыстыя, узроўнілыя вучні, песні і вершы, кветкі для любімых настаўнікаў, напутлівыя словы 9- і 11-класнікам, слёзы бацькоў — так у некалькіх словах можна апісаць урачыстую лінейку ва ўстанове адукацыі. Павіншаваць дзяцей з завяршэннем важнага этапу ў жыцці прыехалі і ганаровыя госці. Так, начальнік аддзела па адукацыі райвыканкама Анатоль Карпіцкі адзначыў, што ў дзяцей завяршыўся важны этап жыцця, калі фарміруюцца асноўныя ўяўленні пра свет, пра сяброўства, назапашваецца вопыт, з якім яны пойдуць у будучыню. Наперадзе самастойныя рашэнні і адказныя учынкі, вялікія магчымасці для самарэалізацыі, каб знайсці сваё месца ў жыцці.

— Прыйшоў час вызначыцца з выбарам будучай прафесіі, працягнуць вучобу па абранай спецыяльнасці. Поспех шмат у чым залежыць ад вашай ініцыятывы, упэўненасці ў сваіх сілах, жадання ісці наперад, — сказаў Анатоль Міхайлавіч.

Пажадалі поспеху выпускнікам дырэктар школы Аксана Харленок, начальнік аддзела ЗАГС райвыканкама Алена Бельская, класны кіраўнік 11 класа Святлана Сцяпанец, мама вучаніцы Анастасія Плігоўка і іншыя госці.

Кранадворны танцавальны нумар для ўсіх прысутных паказалі выпускнікі, а таксама ў вершах расказалі пра цудоўныя гады, праведзеныя ў сценах любімай школы. Для адзінаццацікласнікаў завяршыўся навучальны год, наперадзе іх чакаюць экзамены, а пасля — доўгачаканы выпускны. Сёлета ва ўсіх школах краіны ён пройдзе 10 чэрвеня. І раннім ранкам, сустракаючы світанак, ужо былыя школьнікі загадаюць свае запаветныя жаданні. Многія з дзяцей менавіта на такіх урачыстых мерапрыемствах пачынаюць усведамляць, што школьныя гады праляцелі, як адзін міг, але гэта быў самы цудоўны час знаёмстваў, набыцця не толькі новых ведаў, але і сяброў, а таксама магчымасць праявіць сябе. Гэты дзень для іх радасны і сумны адначасова, бо пад пералівы сімвалічнага званка яны развітваюцца не проста з любімай школай, але і з бесклапотным дзяцінствам. Наперадзе — новыя вяршыні, якія хутка пачнуць заваёўваць. І якую б прафесію дзеці ні выбралі, галоўнае, заставацца вернымі выбранай мэце, як бы цяжка ні прыходзілася. Заўсёды знойдзецца месца ўсяму добраму і светламу, калі верыць у сябе!