15 мая, Віцебск /Вольга Багачова - БЕЛТА/. У эпоху 200-гадовай даўніны верне віцябчан Ноч музеяў у гарадской ратушы, паведамілі карэспандэнту БЕЛТА ў Віцебскім абласным краязнаўчым музеі. Захапляльнае падарожжа ў 1812 год жыхары і госці горада змогуць здзейсніць 18 мая. Урачыстае дзеянне пачнецца з шэсця барабаншчыц на плошчы перад ратушай пад гукі ваеннага аркестра, а затым працягнецца ў залах ратушы, дзе адкрыюцца музычныя, тэатральныя і паэтычныя салоны. Мужчынам будзе цікава даведацца аб гістарычных фактах ваенных дзеянняў, бітвах на Віцебшчыне 1812 года на экспазіцыях выстаў "Ваенна-гістарычная мініяцюра", "Старонкі вайны 1812 года на Віцебшчыне", вылепіць фігуркі салдат, прыняць удзел у паядынку на рапірах, паглядзець паказальныя спартыўныя выступленні. Дамам прадставіцца ўнікальная магчымасць уласнымі рукамі стварыць букецікі і брошкі з бісеру, тканіны, паперы, намаляваць карціны ў стылі рамантызму, загадаць жаданне або даведацца лёс па старадаўнім пушкінскім варажбе. Калі ж усе прысутныя прасякнуцца духам даўно мінулай эпохі, пачнецца баль. Завершыцца акцыя шэсцем са свечкамі да сквера Герояў вайны 1812 года. Ноч музеяў упершыню была арганізавана і праведзена 16 мая 2005 года па ініцыятыве Міністэрства культуры і камунікацыі Францыі. Акцыя заклікана наблізіць гісторыка-культурную спадчыну да гледача, паказаць праз нетрадыцыйнае знаёмства з музеямі іх значнасць у жыцці грамадства.-0-

БЕЛТА