Рэгіянальны конкурс "Сямейнае гняздзечка" збярэ ў Віцебску прадстаўнікоў 50 дынастый педагогаў

22 мая, Віцебск /Алена Ціханава - БЕЛТА/. У рэгіянальным конкурсе творчых праектаў "Сямейнае гняздзечка", вочны этап якога адбудзецца сёння ў Віцебску, прынялі ўдзел 50 педагагічных дынастый вобласці. Аб гэтым карэспандэнту БЕЛТА паведамілі ў Віцебскім абласным інстытуце развіцця адукацыі.

Дынастыі педагогаў гарадоў і раёнаў вобласці прадставілі на конкурс творчыя праекты па чатырох намінацыях: "З века ў век" (гісторыя педагагічнай дынастыі, якая ўключае некалькі пакаленняў), "Муж і жонка ў адукацыі" (прэзентацыя майстэрства і асабістых якасцей сямейных пар педагогаў), "Працяг настаўніцкай дынастыі" (выхаваўчыя ідэі па працягу педагагічных дынастый), "Творчыя ідэі педагагічных дынастый" (творчасць і інавацыі ў адукацыі, свет захапленняў).

Падчас мерапрыемства адбудзецца ўрачыстае ўзнагароджанне ўдзельнікаў завочнага этапу конкурсу і прэзентацыя творчых праектаў 16 дынастый - фіналістаў.

Конкурс творчых праектаў "Сямейнае гняздзечка" па тэме "Мая педагагічная дынастыя" праводзіцца з мэтай умацавання прэстыжу педагагічнай працы, фарміравання пазітыўнага грамадскага меркавання аб прафесіі настаўніка, падтрымкі і развіцця традыцый педагагічных дынастый. Арганізатарамі конкурсу выступаюць упраўленне адукацыі Віцебскага аблвыканкама і дзяржаўная ўстанова дадатковай адукацыі дарослых "Віцебскі абласны інстытут развіцця адукацыі". -0-