21 сакавіка, Мінск /Таццяна Лобас - БЕЛТА/. Самыя чыстыя вадаёмы Беларусі - рэкі і азёры ў Віцебскай вобласці, паведаміў сёння журналістам начальнік Рэспубліканскага цэнтра радыяцыйнага кантролю і маніторынгу навакольнага асяроддзя Мінпрыроды Аляксандр Станкевіч, перадае карэспандэнт БЕЛТА. Сярод найбольш чыстых водных аб'ектаў рэспублікі спецыяліст назваў таксама азёры Нарач, Мястра, Баторына, Свіцязь. Ацэньваючы ў цэлым стан вадаёмаў рэспублікі, Аляксандр Станкевіч адзначыў, што ўмоўна чыстымі можна прызнаць палову вадаёмаў. "Найбольш забруджаныя рэкі і азёры са года ў год застаюцца адны і тыя ж, што звязана з уздзеяннем вялікіх гарадскіх агламерацый, - сказаў ён. - Там, дзе засяроджаны буйныя прамысловыя прадпрыемствы, там і ўзровень забруджвання паверхневых вод вышэйшы, рэкі прымаюць на сябе, вобразна кажучы, удар ад заводаў і фабрык". Найбольш бруднай ракой лічыцца Свіслач ніжэй за скідаючыя сцёкавыя воды Мінскай ачышчальнай станцыі. Забруджаны таксама рака Уза ў раёне Гомеля, Бярэзіна ніжэй Барысава, Пліса ў раёне Жодзіна, Уша ніжэй Маладзечна, Заходняя Дзвіна ў раёне Наваполацка, Полацка і Верхнядзвінска, Ясельда ніжэй Бярозы, Прыпяць ніжэй Пінска, Заходні Буг ля Брэста і Мухавец ля Кобрына. Для паляпшэння сітуацыі неабходна рэканструкцыя шэрагу ачышчальных станцый. "Гэтая праца са года ў год вядзецца: аб'ём сцёкавых вод, які адводзіцца ў рэкі, зніжаецца, але сам працэс ачысткі вод адбываецца павольна, яго можна чакаць у лепшым выпадку праз 5-7 гадоў", - адзначыў Аляксандр Станкевіч. Для беларускіх водных аб'ектаў разлічваецца індэкс забруджвання вод, пры вызначэнні якога ўлічваецца ўтрыманне ў вадзе азоту аміячнага, азоту нітрытнага, нафтапрадуктаў, кіслароду. Згодна з гэтым паказчыкам, каля паловы водных аб'ектаў Беларусі адносяцца да ўмоўна забруджаных і столькі ж да ўмоўна чыстых. "Але гэта вельмі ўмоўная ацэнка: у Беларусі каля 20 тыс. водных аб'ектаў, а назіранні вядуцца толькі на 87 рэках і 74 азёрах. Толькі па гэтых галоўных рэках і азёрах мы судзім аб сітуацыі ў цэлым", - удакладніў спецыяліст. Тым не менш, прэсныя воды Беларусі значна чысцейшыя за рэкі і азёры Еўропы. Гэта звязана з тым, што ў Еўропе прамысловая рэвалюцыя пачалася на 100 гадоў раней, чым у нас, і адпаведна сцёкавыя воды ад заводаў без усякай ачысткі спускаліся ў рэкі і азёры еўрапейскіх дзяржаў.