Вынікі працы сельскай гаспадаркі будуць ацэньвацца зыходзячы з эфектыўнасці і рэнтабельнасці - А.Лукашэнка

9 жніўня, Мінск /Кар. БЕЛТА/. Вынікі працы сельскай гаспадаркі будуць ацэньвацца ў першую чаргу зыходзячы з эфектыўнасці і рэнтабельнасці. Аб гэтым 6 жніўня заявіў Прэзідэнт Беларусі Аляксандр Лукашэнка, наведваючы з рабочай паездкай Віцебскую вобласць, паведамілі БЕЛТА ў прэс-службе беларускага лідара. Прэзідэнт зноў звярнуў увагу на сваё асноўнае патрабаванне - павышэнне эфектыўнасці вядзення сельскай гаспадаркі. "Валавы збор і іншае - гэта добра, але патрэбна эфектыўнасць. Давайце палічым, колькі сродкаў укладзена і якая будзе рэнтабельнасць, - сказаў ён. - Падкрэсліваю, ацэньваць буду не па тэмпах і ўраджайнасці. Галоўнае - гэта эфект, які будзем мець ад збожжа, малака і мяса. З гэтага трэба рабіць усе разлікі". Кіраўнік дзяржавы таксама звярнуў увагу на пытанне якаснай нарыхтоўкі кармоў і сельскагаспадарчых культур. На яго думку, гэтаму неабходна надаць першачарговую ўвагу. Аляксандру Лукашэнку ў ходзе наведвання СПК "Маяк Браслаўскі" было даложана аб ходзе ўборачнай кампаніі ў краіне. Па словах міністра сельскай гаспадаркі і харчавання Міхаіла Русага, на 6 жніўня ў Беларусі сабрана амаль 6 млн.т збожжа. Адначасова ў краіне ідзе сяўба азімых. Што тычыцца азімага рапсу, то насенне цалкам нарыхтавана, і прынята рашэнне павялічыць пасяўныя плошчы гэтай культуры. Як адзначыў старшыня Віцебскага аблвыканкама Аляксандр Косінец, у Віцебскай вобласці ўжо ўбрана 70% плошчаў, сярэдняя ўраджайнасць збожжавых складае 22,1 ц/га. Адной з асноўных праблем Віцебшчыны застаецца нізкая контурнасць палёў. Губернатар запэўніў Прэзідэнта, што ў амбарнай вазе ўраджай гэтага года будзе роўны леташняму. Аляксандр Лукашэнка даручыў паскорыць рэалізацыю рэспубліканскай праграмы развіцця льняной галіны. Яе неабходна завяршыць за бягучы і наступны гады. Ён адзначыў, што ў папярэднія гады гэтаму напрамку надавалася недастаткова ўвагі. "Нічога ж не змянілася: тыя ж людзі, усё тое ж практычна, і пры такой надвор'і лён вырасцілі. Былі ж лепшыя гады, але не вырошчвалі. Не ўмелі апрацоўваць? Умелі. Безалаберна ставіліся. Таму пакладзена 60 тыс.т - усё трэба зрабіць, каб у гэтым годзе і ў будучым закрыць тэму і мы больш не размаўлялі па доўгім валакне", - сказаў кіраўнік дзяржавы.

Як было даложана Прэзідэнту, у краіне завяршаецца ўборка лёну. Няблагая якасць гэтай культуры адзначаецца ў Гомельскай, Віцебскай і Брэсцкай абласцях. У мэтах эксперыменту два поля былі засеяны па французскай тэхналогіі. Як адзначыў Міхаіл Русы, у Беларусі будуць істотна мяняцца падыходы да вырошчвання лёну. Прэзідэнт паставіў задачу закупіць неабходнае абсталяванне, якое дасць магчымасць павысіць якасць выпускаемага ільновалакна. "Трэба ставіць новыя лініі на ільнозаводах, пры гэтым браць лепшыя. А пасля вырабляць гэтыя лініі ў сябе", - сказаў Аляксандр Лукашэнка. На сённяшні дзень знос асноўных фондаў на ільнозаводах дастаткова высокі. На тры ільнозаводы ў Мазыры, Оршы і Гомелі плануецца завезці новае абсталяванне з Бельгіі. Кіраўнік дзяржавы запатрабаваў падвоіць вытворчасць прадукцыі на гэтых заводах. Што ж тычыцца гатовай прадукцыі з лёну, то па-ранейшаму застаюцца вялікія складскія запасы. Ён адзначыў, што попыт на ільняныя тканіны вялікі, у апошні час павялічаны пастаўкі такіх тканін у Расію і Еўропу. Другім аб'ектам, які наведаў кіраўнік дзяржавы ў ходзе рабочай паездкі, стала база адпачынку "Дрывяты" нацыянальнага парку "Браслаўскія азёры". Прэзідэнт азнаёміўся з інфраструктурай і арганізацыяй работы базы. Уведзеная ў эксплуатацыю ў 1998 годзе, яна займае плошчу 3,8 га, на якіх размясціліся тры спальных корпуса амаль на 100 месцаў, рэстаран, банкетная зала, руская лазня, культурна-аздараўленчы цэнтр і іншыя аб'екты інфраструктуры. Як далажыў Аляксандру Лукашэнку губернатар Віцебскай вобласці Аляксандр Косінец, плануецца актыўна развіваць магчымасці для адпачынку як на Браслаўскіх азёрах, так і ў вобласці ў цэлым. Ужо цяпер на Віцебшчыне дзейнічаюць амаль 300 аграсядзіб, у бліжэйшы час іх колькасць прадугледжваецца павялічыць да 500. У развіццё турыстычнай інфраструктуры, акрамя дзяржаўных сродкаў, актыўна прыцягваецца інвестарскі капітал. На думку Аляксандра Лукашэнкі, калі вырашыць праблему дарог, то гэта створыць дадатковыя магчымасці, у тым ліку для прыцягнення інвестараў. У рэгіёне Браслаўскіх азёр плануецца развіваць сетку дарог, якія звяжуць паміж сабой азёры. Нацыянальны парк "Браслаўскія азёры" - адзін з найбольш каштоўных прыродных аб'ектаў Беларусі. На яго тэрыторыі прадстаўлены практычна ўсе віды флоры і фаўны, характэрныя для беларускага Паазер'я.Затым кіраўнік дзяржавы пагутарыў з адпачывальнікамі ў "Дрывятах", сярод якіх было нямала расіян, у тым ліку масквічоў. Аляксандр Лукашэнка адзначыў, што ў Беларусі заўсёды цёпла прымаюць гасцей з Расіі. "Камусьці ў Расіі хочацца, каб мы з вамі пасварыліся, але я кажу - не дачакаецеся. Якія б фільмы там ні здымалі, што б ні пісалі, усё роўна не атрымаецца пасварыць беларусаў і расіян", - сказаў ён. На думку Прэзідэнта, у стварэнні аб'ектаў турыстычнай інфраструктуры на Браслаўскіх азёрах мог бы паўдзельнічаць расійскі капітал, і ў далейшым сюды маглі б прыехаць на адпачынак яшчэ больш расіян. Адна з масквічак, якая адпачывала ў "Дрывятах", падзякавала Аляксандру Лукашэнку за тое, што ў Беларусі з вялікай увагай ставяцца да захавання памяці аб Вялікай Айчыннай вайне. Яна адзначыла наяўнасць вялікай колькасці помнікаў і мемарыялаў, за якімі даглядаюць і падтрымліваюць у добрым стане. Па словах кіраўніка дзяржавы, у тым ліку для захавання памяці аб падзеях тых гадоў прынята рашэнне аб будаўніцтве ў Мінску новага будынка для музея Вялікай Айчыннай вайны.-0-

БЕЛТА