15 чэрвеня, Санкт-Пецярбург /Вольга Беляўская - БЕЛТА/. Расія падтрымае сваіх партнёраў па Мытным саюзе ў перамовах аб уступленні ў САT. Пра гэта заявіў сёння старшыня ўрада Расійскай Федэрацыі Дзмітрый Мядзведзеў на бізнес-форуме "ЕЭП: новыя магчымасці прамысловага развіцця", перадае карэспандэнт БЕЛТА. "Мы ў любым выпадку будзем аказваць усялякае садзейнічанне на перамоўным трэку па ўступленні нашых партнёраў у САT", - сказаў кіраўнік расійскага ўрада. На яго думку, Мытны саюз паскорыць уступленне яго краін-удзельніц у САT. "У нейкі момант нам усім паслалі выразны і недвухсэнсоўны сігнал: калі вы гэта зробіце (пойдзеце на фарміраванне Мытнага саюза. - Заўв. БЕЛТА), мы вас не прымем у САT. Нічога - прымаюць, і вас прымуць, усіх прымуць", - сказаў Дзмітрый Мядзведзеў. Паводле яго слоў, Мытны саюз, фарміраванне ЕЭП і ў будучыні Еўразійскага саюза стварае новыя ўмовы для вядзення бізнесу. Сёння ў Санкт-Пецярбургу будзе падпісаны мемарандум, які прадугледжвае стварэнне пры калегіі Еўразійскай эканамічнай камісіі кансультатыўнага савета, які дапаможа забяспечыць больш надзейную зваротную сувязь паміж прадпрымальнікамі і чыноўнікамі. "Важна, каб міністэрствы чулі голас бізнесу, тым больш у цяперашніх умовах, - адзначыў Дзмітрый Мядзведзеў. - Бізнес-супольнасці павінны вызначаць каардынатараў, якія будуць рабіць рэкамендацыі па канкрэтных напрамках дзейнасці. У мяне няма ілюзіі, што наша праца будзе без праблем або стварэнне Мытнага саюза створыць імгненна велізарную колькасць бізнес-кангламератаў, аднак у той частцы, якая будзе адпавядаць вашым уяўленням аб неабходнасці інтэграцыі, мы будзем дапамагаць і арганізацыйна, і эканамічна". Кіраўнік расійскага ўрада падкрэсліў, што аб'ём узаемнага гандлю паміж краінамі Мытнага саюза вырас на 36% да $125 млрд. Гэта значыць, што аб'яднанне працуе.-0-

БЕЛТА