Румас: IT-сфера – нацыянальны прыярытэт развіцця Беларусі

IT-сфера – нацыянальны прыярытэт развіцця Беларусі, заявіў прэм'ер-міністр Беларусі Сяргей Румас сёння на пленарным пасяджэнні форуму "Лічбавая будучыня глабальнай эканомікі" ў Алматы, паведамляе карэспандэнт БЕЛТА. "Ставячы перад сабой амбіцыйную мэту па стварэнні IT-краіны, мы прынялі выклік па перабудове эканомікі, пераводзе яе на лічбавыя рэйкі, - сказаў Сяргей Румас. - Вызначыўшы IT-сферу нацыянальным прыярытэтам развіцця, дзяржава сфарміравала неабходныя стартавыя ўмовы. У Беларусі створана развітая і адпаведная сусветным стандартам інфраструктура перадачы, захоўвання і апрацоўкі даных, механізмы ідэнтыфікацыі, сучасныя сродкі абароны інфармацыі".

Адным з ключавых у гэтай галіне стаў праект па стварэнні Рэспубліканскага цэнтра апрацоўкі даных. "На сённяшні дзень цэнтр сертыфікаваны па міжнародных стандартах і забяспечвае найвышэйшы ўзровень бяспекі і адмоваўстойлівасці. Ужо сёння больш за 400 дзяржорганаў і арганізацый ажыццявілі паэтапны пераход на выкарыстанне паслуг рэспубліканскага ЦАД і воблачнай платформы", - адзначыў прэм'ер-міністр.

Сяргей Румас назваў сярод ужо рэалізаваных у Беларусі праектаў - праграмна-тэхнічны комплекс уліку падатковых рахункаў-фактур. Гэта дазволіла ўвесці па ўсёй краіне электронныя рахункі-фактуры замест папяровых і стварыць дзяржаўную сістэму па іх апрацоўцы, захоўванні, перадачы і прыёме з дапамогай тэхнічных, праграмных сродкаў. Уведзена адзіная аўтаматызаваная сістэма электронных рэцэптаў для Міністэрства аховы здароўя. Такое рашэнне забяспечвае ўніфікаваны бяспечны доступ да баз даных Мінздароўя з любой кропкі Беларусі, што скароціць выдаткі і паскорыць укараненне IT у ахове здароўя. Сістэма міжведамаснага электроннага дакументаабароту дзяржаўных органаў дазволіла забяспечыць абмен электроннымі паведамленнямі паміж усімі дзяржаўнымі органамі і арганізацыямі на адзінай платформе.

"Трэба адзначыць, што ўкараненне электроннага дакументаабароту ў маштабах усёй краіны - унікальны досвед, і мы тут у ліку лідараў, - падкрэсліў прэм'ер-міністр. - Адзін з найважнейшых праектаў, над якім сёння працуем, - стварэнне нацыянальнай інтэграцыйнай даведачна-разліковай сістэмы. Гэта ключавы этап лічбавай трансфармацыі, які дазволіць нам пачаць выдачу біяметрычных пашпартоў (ID-карт і электронных пашпартоў) і забяспечыць свабодны доступ да паслуг электроннага ўрада ў рэжыме 24/7".

Сяргей Румас асабліва спыніўся на поспехах Парка высокіх тэхналогій. "Нашы вынікі і дасягненні ў сферы IT пакуль яшчэ нельга параўноўваць з сусветнымі лідарамі. Але ў чымсьці мы таксама дасягнулі поспеху. Наш Парк высокіх тэхналогій, створаны дзякуючы асабістай падтрымцы кіраўніка дзяржавы, стаў ва Усходняй Еўропе рэгіянальным цэнтрам прыцягнення лепшых талентаў і розумаў. Гэта самы хуткарослы сектар эканомікі Беларусі - экспарт па выніках мінулага года склаў $2 млрд. Хоць тры гады таму ён не перавышаў і чвэрць гэтай сумы. За апошнія два гады колькасць рэзідэнтаў вырасла і сёння набліжаецца да 800. Гэта ўлівае аптымізм на будучыню", - дадаў ён.

Прэм'ер-міністр Беларусі Сяргей Румас 30-31 студзеня знаходзіцца з рабочым візітам у Казахстане. Кіраўнік беларускага ўрада сёння ў Алматы прыме таксама ўдзел у пасяджэнні Еўразійскага міжурадавы савета.

Беларусь з 1 студзеня старшынствуе ў органах Еўразійскага эканамічнага саюза.