Саманта Фокс і "Бураноўскія бабулі" прыедуць на "Славянскі базар"

11 мая, Віцебск /Дзіяна Курыла - БЕЛТА/. Саманта Фокс, Крыс Норман, Алесандра Сафіна і "Бураноўскія бабулі" возьмуць удзел у канцэрце ўрачыстага адкрыцця XXI Міжнароднага фестывалю мастацтваў "Славянскі базар у Віцебску". Сёння журналістаў пазнаёміў з афішай фестывалю генеральны дырэктар цэнтра культуры "Віцебск", дырэктар дырэкцыі фестывалю Радзівон Бас, перадае карэспандэнт БЕЛТА. На галоўным канцэрце "Славянскага базару" таксама выступяць Ірына Алегрова, Валерыя, Леў Лешчанка, Барыс Маісееў. Аляксандр Разенбаўм, дзяржаўны акадэмічны ансамбль народнага танца імя Ігара Маісеева, Аляксандр Рыбак, тэатр Андрэя Данілкі, Аннэ Вескі. А вось імёны беларускіх удзельнікаў канцэрта адкрыцця будуць названы пазней, таксама як і выканаўцаў на гала-канцэрце майстроў мастацтваў Беларусі на нацыянальным дні культуры. Упершыню за ўвесь час правядзення фестывалю Беларусь так доўга трымае паўзу перад тым, як назваць імёны сваіх эстрадных зорак. Расія і Украіна ўжо вызначыліся з тымі, каму давераць сёлета прадстаўляць сваё мастацтва. Дзяржаўны акадэмічны ансамбль народнага танца ім. Ігара Маісеева дасць юбілейны канцэрт, прысвечаны 75-годдзю ансамбля ў Дзень культуры Расіі. Тэатр Андрэя Данілкі будзе самым вядомым на канцэрце, прысвечаным Дню культуры Украіны. Традыцыйна на фестывалі пройдзе Дзень Саюзнай дзяржавы. Юбілей знакамітага расійскага танцавальнага калектыву будзе не адзіным на сёлетнім "Славянскім базары". "Нам 25! Усё пачынаецца спачатку" - такую назву сваёй святочнай праграме даў Нацыянальны канцэртны аркестр Рэспублікі Беларусь пад кіраўніцтвам Міхаіла Фінберга. У суправаджэнні аркестра выступяць Сяргей Дробаценка, Максім Дунаеўскі, Вікторыя П'ер-Мары. Калі аркестр Міхаіла Фінберга адзначае чвэрць стагоддзя свайго існавання, то Леў Лешчанка адзначыў паўвекавы юбілей сцэнічнай дзейнасці і 70-годдзе з дня нараджэння. Бенефіс любімага многімі артыста пройдзе на сцэне Летняга амфітэатра на "Славянскім базары". У дні фестывалю ў Летнім амфітэатры таксама пройдуць сольныя канцэрты Валерыі, Аляксандра Разенбаўма, Ірыны Алегровай, Сяргея Пянькіна. Яшчэ адной пляцоўкай фестывалю, па традыцыі, з'яўляецца канцэртная зала "Віцебск". Тут выступяць Пелагея, Барыс Маісееў і пройдуць спектаклі праекта "Тэатральныя сустрэчы".

Тэатральная афіша фестывалю складзена са спектакляў расійскіх тэатраў, антрапрыз і Нацыянальнага акадэмічнага драматычнага тэатра імя М. Горкага. Большасць спектакляў аб'ядноўвае адно - у іх заняты артысты, якіх гледач больш ведае па тэлебачанні: Аляксей Панін, Жанна Эппле, Алеся Жалезняк, Юлія Мяньшова. Радзівон Бас з асаблівай гордасцю адзначыў, што беларускае тэатральнае мастацтва сёлета на фестывалі прадставіць тэатр імя М. Горкага са сваім спектаклем "Пан Коханку", у якім занята больш за 40 акцёраў, і сярод іх - Расціслаў Янкоўскі. Фестывальная кінапраграма прадстаўлена беларускім, расійскім і літоўскім кіно. Гледачы ўбачаць мастацкія фільмы "Самотнае востраў", "Дом", "Гарачае сэрца", "Дом ветру". Галоўнай інтрыгай фестывалю на працягу ўсяго часу яго існавання з'яўляецца міжнародны конкурс выканаўцаў эстраднай песні "Віцебск". У сёлетнім спеўным спаборніцтве прыме ўдзел 21 артыст з 21 краіны. Упершыню нацыянальныя адборачныя туры акрамя Беларусі, Расіі, Украіны правялі Латвія, Эстонія і Малдова. Беларусь на конкурсе будзе прадстаўляць 23-гадовы Яўген Даліч, Расію - 22-гадовая Анастасія Казлова, Украіну - 29-гадовая Галіна Конах. Журы конкурсу ўзначаліць кампазітар Максім Дунаеўскі, а ў яго склад увайшлі папулярныя выканаўцы - Аляксандр Ціхановіч, Алесандра Сафіна, Ане Вескі. Дзіцячы музычны конкурс па напале запалу не саступае свайму старэйшаму брату. Сёлета міжнародны дзіцячы музычны конкурс адзначае 10-годдзе. У ім прымуць удзел 21 маленькі спявак з 18 дзяржаў. Беларусь будуць прадстаўляць Яўгенія Кляпіцкая і Ліза Мураўёва, Расію - Айгуль Валіуліна, Ганна Музафарава, Украіну - Паліана Рыжак і Валерыя Хаменка. Усе шэсць дзяўчынак - пераможцы нацыянальных адборачных тураў. Журы дзіцячага конкурсу ўзначаліць кампазітар і спявак Джамал Сепіашвілі. Урачыстае закрыццё фестывалю адбудзецца 18 ліпеня. У канцэрце прымуць удзел Алсу, Надзея Бабкіна, Лаліта, Дзяніс Майданаў, Соса Паўліяшвілі. Аднак з урачыстым закрыццём фестываль не скончыцца. Канцэрты-пасляслоўі пройдуць яшчэ на працягу двух дзён. Завяршальным акордам стане сольнік Гарыка Сукачова. Міжнародны фестываль мастацтваў "Славянскі базар у Віцебску" пройдзе з 12 па 18 ліпеня.-0-

БЕЛТА