15 лютага, Віцебск /Дзіяна Курыло - БЕЛТА/. Дзесяць народных абрадаў правядуць цягам 2012 года ў Полацкім раёне. Новы праект, закліканы адрадзіць самабытныя звычаі палачан, рэалізуюць мясцовыя самадзейныя клубы пры падтрымцы райвыканкама, расказаў карэспандэнту БЕЛТА намеснік старшыні Полацкага райвыканкама Пётр Петкевіч. Народныя святы з'яўляюцца неад'емнай часткай нацыянальнай культуры. На жаль, з часам многія добрыя традыцыі, якія служаць аб'яднанню людзей, сталі забывацца, адзначыў суразмоўца. Члены аматарскіх самадзейных калектываў, якіх нямала на Полаччыне, па крыху збіраюць і аднаўляюць традыцыі народных гулянняў, захоўваюць легенды і павер'і, звязаныя з тымі ці іншымі святамі ці абрадамі. Сёлета аматарскія калектывы выйшлі з ініцыятывай правесці ў вёсках раёна дзесяць майстар-класаў па абрадах і тым самым удыхнуць у іх новае жыццё. "Мы спадзяёмся, што многія стародаўнія традыцыі знойдуць водгук у сучасных жыхароў вёскі, а таксама дазволяць прыцягнуць турыстаў", - сказаў Пётр Петкевіч. Як у ансамблі з дзесяці артыстаў, у кожнага абраду будзе самастойная партыя. Па-старынцы згуляюць "Вяселле", правядуць "Хрэсьбіны", збяруцца на "Кузьмінкі" (так называлі вясковыя пасядзелкі, якія пачыналіся ў лістападзе). На "Юр'я", які лічыўся ў беларусаў найлепшым днём для першага выпасу кароў у поле, у адным з гаспадарак у адпаведнасці са старымі павер'ямі будуць выводзіць на летні выпас жывёлу. А яшчэ на Полаччыне збіраюцца паказаць, як прабабулі пяклі чорны хлеб і варылі сыр, як прадзеды здымалі на Яблычны Спас яблыкі, а на Мядовы - загаворвалі пчол.-0-

БЕЛТА