20 верасня, Віцебск /Дзіяна Курыло - БЕЛТА/. Самаму малодшаму члену дэлегацыі Віцебскай вобласці на рэспубліканскім фестывалі-кірмашы працаўнікоў вёскі "Дажынкі-2012" усяго пяць гадоў, расказалі карэспандэнту БЕЛТА ў камітэце па сельскай гаспадарцы і харчаванні Віцебскага аблвыканкама. Сярод заслужаных і паважаных аграрыяў ёсць імя пяцігадовай Насці Лук'яненкі. Разам са сваім дзевяцігадовым братам Сяргёем, мамай Святланай і татам Дзмітрыем дзяўчынка адправіцца на грандыёзнае свята. Сям'я Лук'яненкаў з Глыбоцкага раёна стала пераможцам абласнога конкурсу сямейнага сельскагаспадарчага праекта "Гаспадар сяла" і прыме ўдзел у фінале праекта, які пройдзе на "Дажынках-2012". У склад дэлегацыі Віцебскай вобласці ўключана сто чалавек. Гэта камбайнеры, вадзіцелі, кіраўнікі гаспадарак, раёнаў, гарадоў і прадпрыемстваў, якія аказалі значную шэфскую дапамогу аграрыям. Пераможцамі рэспубліканскага конкурсу па ўборцы збожжавых і зернебабовых культур у 2012 годзе сярод раёнаў стаў Верхнядзвінскі, сярод сельскагаспадарчых арганізацый - ААТ "Рудакова" Віцебскага раёна, сярод камбайнераў - Уладзімір Лаўцэвіч з ААТ "Докшыцкі райаграсэрвіс", які намалаціў у гэту жніво 2,8 тыс. т збожжавых і зернебабовых. Пераможцам у намінацыі "Землекарыстанне высокай культуры земляробства, добраўпарадкаванне машынных двароў, жывёлагадоўчых ферм і комплексаў" стаў Аршанскі раён. Аграрыі Віцебшчыны сёлета намалацілі амаль 1,4 млн. т збожжа - найбольшы паказчык за апошнія 36 гадоў. Раніцай 21 верасня дэлегацыя вобласці адправіцца ў сталіцу "Дажынак-2012" - Горкі.-0-

БЕЛТА