2 мая, Віцебск /Вольга Багачова - БЕЛТА/. Школьнікі Віцебскай вобласці намалявалі 250 паштовак да лонданскай Алімпіяды, паведамілі карэспандэнту БЕЛТА ў прэс-службе прадстаўніцтва НАК у Віцебскай вобласці. Алімпійскія паштоўкі, выкананыя ў разнастайных тэхніках (малюнак, папяровая пластыка, нітачны дызайн, выцінанка, разьба па дрэве), на творчы конкурс даслалі школьнікі з 27 гарадоў і раённых цэнтраў Віцебшчыны. Сёння ў віцебскай бібліятэцы імя Я.Маўра адбудзецца ўрачыстае адкрыццё выстаўкі работ, якія прыйшлі на конкурс, на якой будуць прадстаўлены 65 найбольш цікавых экзэмпляраў. Пераможцы творчага спаборніцтва вызначаны ў узроставых катэгорыях 6-9 гадоў, 10-13 гадоў, 14-16 гадоў. Ва ўрачыстай абстаноўцы прызёры конкурсу зачытаюць тэксты для сваіх паштовак. Затым пасланні будуць перададзены спартсменам Віцебскай вобласці, якія прадстаўляюць Беларусь на Алімпійскіх гульнях у Лондане. Мерапрыемства праводзіцца з мэтай развіцця творчага патэнцыялу падрастаючага пакалення і больш глыбокага вывучэння пытанняў, звязаных з алімпійскім рухам. Яго арганізатарамі выступаюць прадстаўніцтва НАК у Віцебскай вобласці і ўпраўленне адукацыі Віцебскага аблвыканкама.-0-

БЕЛТА