“З добрым сэрцам -- у школу”
“З добрым сэрцам -- у школу”
Акцыя пад такой назвай аб’яднала ўсіх вучняў сярэдняй школы № 3, якія пажадалі аказаць дапамогу дзецям са шматдзетных, няпоўных, прыёмных сем’яў, а таксама дзецям-інвалідам. Мерапрыемства было арганізавана раённым камітэтам ГА “БРСМ”.
Аб правядзенні акцыі ў школе паведамлялася загадзя. На перапынку, пасля другога ўрока ў фае школы загучала музыка. Прыемна было назіраць, як малышы і старшакласнікі спяшаюцца да актывістаў раённай арганізацыі “БРСМ”, каб падзяліцца ўласнымі рэчамі. У асноўным вучні прыносілі канцылярскія прыналежнасці: сшыткі, ручкі, алоўкі, блакноты, каляровую паперу і г.д.
Усе рэчы, сабраныя ў рамках акцыі, будуць размеркаваны сярод вучняў сярэдняй школы № 3, якім патрэбна дапамога, а таксама дзецям, якія засталіся без увагі бацькоў і знаходзяцца на выхаванні ў сацыяльна-педагагічным цэнтры.
“Восеньскі сарафан”
Як пашыць сукенку з бытавых рэчаў, аздобіць яе садавінай і гароднінай? Адказ на гэтае пытанне ведаюць юныя прыгажуні — вучаніцы сярэдняй школы № 3, якія сталі ўдзельніцамі школьнага конкурсу “Восеньскі сарафан”. Згодна з умовамі конкурсу дзяўчаты павінны былі пашыць арыгінальны восеньскі сарафан і прадэфіліраваць у ім.
Прыняць удзел у мерапрыемстве пажадалі і малодшыя школьніцы, і вучаніцы старэйшых класаў. Паглядзець на гэтае яркае відовішча ў актавай зале школы сабраліся шматлікія гледачы. Утварыўся парад прыгажосці, майстэрства, фантазіі і натхнення. Якіх толькі цудоўных вырабаў тут не было! Юныя канкурсанткі падрыхтавалі ўборы з гародніны, восеньскіх ягад, пластыкавых вырабаў, непатрэбных бытавых рэчаў, у тым ліку… поліэтыленавых пакетаў.
Кожная з канкурсантак уразіла гледачоў сваёй непаўторнасцю. На думку журы, самымі арыгінальнымі аказаліся сарафаны вучаніцы чацвёртага “А” класа Дашы Лебедзевай, Лізы Тарасавай (пяты “А” клас), вучаніцы дзявятага “В” класа Крысціны Азаронак, а таксама Юліі Памалейкі (адзінаццаты “А” клас). Прызам сімпатый гледачоў адзначаны восеньскі ўбор вучаніцы пятага “А” класа Вольгі Чарныш, якая ўпрыгожыла сваю сукенку накрыўкамі для закручвання.
Кожная з юных удзельніц конкурсу атрымала Ганаровую грамату. Самая ж галоўная ўзнагарода для канкурсантак — гэта станоўчыя эмоцыі і яркія ўражанні гледачоў, што прыйшлі ў захапленне.
Канстанцін ВІННІК,
студэнт факультэта
міжнародных адносін
Белдзяржуніверсітэта.