9 чэрвеня, Мінск /Кар. БЕЛТА/. У Беларусі будзе ўведзена сістэма мер па абароне спажывецкага рынку ад неабгрунтаванага вывазу тавараў за мяжу. Аб гэтым сёння паведаміў журналістам дзяржаўны сакратар Савета Бяспекі Беларусі Леанід Мальцаў, перадае карэспандэнт БЕЛТА. Па словах Леаніда Мальцава, прынятыя меры па абароне насельніцтва ад росту цэн выклікалі іншую праблему, якая звязана з тым, што цэны ў суседніх краінах на сацыяльна значныя тавары вышэйшыя. "Асобныя нядобрасумленныя людзі спрабуюць на гэтых праблемах нажывацца. Таму зараз адпрацоўваецца сістэма мер па абароне спажывецкага рынку, у тым ліку і ад неабгрунтаванага вывазу тавараў за мяжу. Па-за ўсякім сумневам, гэтая сістэма мер у бліжэйшы час будзе адпрацавана і будзе дакладна дзейнічаць", - сказаў дзяржсакратар Савета Бяспекі. Леанід Мальцаў адзначыў, што праблемы не павінны быць нагодай для рознага роду інсінуацый і раскачвання сітуацыі. "Яны не павінны быць нагодай для асобных людзей, каб на гэтых праблемах спрабаваць вырашыць нейкія пытанні свайго дабрабыту", - падкрэсліў ён. Дзяржсакратар Савета Бяспекі таксама ўдакладніў, што плануюцца меры будуць часовымі, і выказаў упэўненасць у тым, што сітуацыя па ўсіх напрамках будзе стабілізавана. У першую чаргу маюцца на ўвазе эканамічныя меры. "Тое, што спажывецкі рынак будзе абаронены, - гэта адназначна. І тое, што ступень абароны і ступень дзеяння мер будзе адпавядаць той абстаноўцы, якая складваецца, - гэта таксама адназначна. Сістэма будзе мяняцца ў залежнасці ад змены абстаноўкі на рынку", - сказаў Леанід Мальцаў. У якасці адной з найбольш вострых праблем ён згадаў сітуацыю, звязаную з вывазам паліва з Беларусі з-за розніцы цэн. "Калі яно (бензін. - Заўвага. БЕЛТА) каштуе ў нас танней, то выязджаеш за мяжу - заплаці гэту розніцу", - адзначыў Леанід Мальцаў, кажучы пра магчымыя варыянты вырашэння гэтай праблемы. "У нас ёсць заканадаўства, у адпаведнасці з якім будуць прымяняцца ў тым ліку жорсткія, але вымушаныя меры. Нам трэба стабілізаваць сітуацыю, а не расхістаць яе. Па-за ўсякім сумневам, гэтыя меры будуць адпавядаць усім міжнародным нормам і абавязацельствам Беларусі, узятым у двухбаковых і шматбаковых адносінах, у межах Мытнага саюза і іншых аб'яднанняў. Яны будуць адэкватныя, але ў межах дасягнутых дамоўленасцей", - дадаў дзяржсакратар Савета Бяспекі Беларусі.-0-

БЕЛТА