27 кастрычніка, Віцебск /Дзіяна Курыло - БЕЛТА/. Сродкі масавай інфармацыі павінны аб'ектыўна адлюстроўваць рэчаіснасць, сказала сёння журналістам пасля пасяджэння Віцебскага аблвыканкама першы намеснік міністра інфармацыі Лілія Ананіч, перадае карэспандэнт БЕЛТА. СМІ з'яўляюцца важным звяном дзяржаўнай інфармацыйнай палітыкі. "Гэта не чацвёртая ўлада, а партнёры ўлады", - дадала Лілія Ананіч. "СМІ павінны аб'ектыўна адлюстроўваць рэчаіснасць. Не трэба замаўчаць цяжкасці, сыходзіць ад вырашэння праблем чалавека, але і апускацца да ўзроўню крытыканства недапушчальна", - падкрэсліла яна. Крытычныя матэрыялы павінны быць канструктыўнымі і несці прапановы. Лілія Ананіч распавяла, што Міністэрства інфармацыі рэалізуе ў Віцебскай вобласці буйны інвестыцыйны праект па замене абсталявання ў Наваполацкай друкарні. У бліжэйшы час раённыя газеты паўночна-заходняга раёна вобласці атрымаюць магчымасць выходзіць на 16 палосах у колеры. "Трэба ўжо думаць, чым напоўніць гэтыя палосы, як іх зрабіць цікавымі. Пакуль узровень некаторых раённых газет вобласці не адпавядае сучасным патрабаванням", - лічыць першы намеснік міністра.-0-

БЕЛТА