Збор будучых дэлегатаў Усебеларускага народнага сходу, прадстаўнікоў Віцебскай абласной арганізацыі РГА «Белая Русь» прайшоў у аблвыканкаме.
Збор будучых дэлегатаў Усебеларускага народнага сходу, прадстаўнікоў Віцебскай абласной арганізацыі РГА «Белая Русь» прайшоў у аблвыканкаме. На ім абмеркавалі асноўныя палажэнні праекта праграмы сацыяльна-эканамічнага развіцця Рэспублікі Беларусь на 2021–2025 гады, якія нядаўна выйшлі, а таксама ў форме адкрытага дыялогу ўзнялі некаторыя важныя пытанні эканамічнага і сацыяльнага развіцця Віцебскага рэгіёну.
Так, на зборы прапанавалі перагледзець на Віцебшчыне дзеянне пастановы Савета Міністраў па стварэнні ў рэгіёнах так званых службаў заказчыкаў у сістэме ЖКГ, якая з усіх абласцей была ўкаранёна толькі ў Віцебскай.
— Дадзеная пастанова павінна была прывесці да ўдасканалення і развіцця жыллёва-камунальнай гаспадаркі краіны, але па факце стварыла нямала праблем. Іх ужо адчулі і горад, і райцэнтры, і сельскія саветы вобласці, — адзначыў старшыня гарадскога Савета дэпутатаў Уладзімір Белевіч. — Мясцовыя выканаўчыя і распарадчыя органы, па сутнасці, пазбавіліся магчымасці ўплываць на бягучую сітуацыю, нават калі дзесьці адбыліся аварыйныя сітуацыі. Усе заяўкі павінны ісці толькі праз службу заказчыка, дзе на выкананне любых відаў работ пакладзена правесці тэндэр. А дапушчальны тэрмін арганізацыі дадзенай працэдуры — месяц. Пастанова сама па сабе, вядома, мае права на існаванне, толькі пры ўмове стопрацэнтнага выдзялення сродкаў па артыкуле «Бягучае добраўпарадкаванне і ўтрыманне населеных пунктаў».
Старшыня абласнога Савета дэпутатаў і абласной арганізацыі РГА «Белая Русь» Уладзімір Церанцьеў адзначыў, што дастаткова моцны вынік на розных алімпіядах паказваюць сельскія школы. Да прыкладу, вучань Ушацкай сярэдняй школы заняў 1-е месца па хіміі і набраў 92 балы. Лепшы прадстаўнік Віцебска па тым жа прадмеце мае на парадак менш.
— Таму ініцыятыва дырэктара Віцебскай гімназіі № 2 Канстанціна Кісялёва аб стварэнні ў горадзе абласной гімназіі, дзе будуць навучацца адораныя дзеці з раённых і сельскіх школ, павінна быць рэалізавана, — лічыць Уладзімір Уладзіміравіч. — Час паказаў, што рашэнне закрыць у Лужасня школе для адораных дзяцей было памылкай. Бо не заўсёды ў раённых школах могуць да канца раскрыць патэнцыял юных талентаў.
На сходзе былі ўзняты і іншыя актуальныя пытанні. Да прыкладу, кіраўнік адміністрацыі Першамайскага раёна Мікалай Арлоў пацікавіўся, калі ў вобласці з'явіцца хаця б адзін факультэт, дзе будуць рыхтаваць спецыялістаў жыллёва-камунальнай гаспадаркі.