Супрацоўнікі ДАІ ўзмацняюць кантроль на дарогах у цёмны час сутак

У адным з рэйдаў журналіст газеты «Лепельскі край» адправіўся разам з праваахоўнікамі. У першую чаргу выяўлялі парушэнні Правілаў дарожнага руху, тлумачылі «небачаным» у цемры пешаходам правілы бяспечных паводзін на дарозе, а таксама праманіторылі сельскія населеныя пункты.
На гадзінніку – 7.00 раніцы. Шлях наш ляжыць у бок вёскі Старое Лядна, бо там ажыўленая траса, жыхары часта ідуць на працу і вяртаюцца дадому пешшу прама па ўзбочыне.
Нам насустрач едуць аўтамабілі, фары якіх асляпляюць вочы, хоць і ўключаны блізкае святло, успрыманне абстаноўкі вакол, трэба сказаць, не самае лепшае. Разгледзець ва ўмовах пешахода, а яны ў асноўным зімой у цёмным адзенні, вельмі складана. Гэта як шукаць чорную кошку ў цёмным пакоі.
А вось і першыя пешаходы, якіх мы заўважылі толькі дзякуючы маленькім флікерам. Хоць некаторыя грамадзяне іх і лічаць «бескарысным» элементам на адзенні, але, паверце, яны выратавалі шмат чалавечых жыццяў.
-- Вось паглядзіце, як складана кіроўцу заўважыць на праезнай частцы чалавека. Ідзе мужчына правільна -- насустрач транспарту, на руцэ – святлоадбівальны элемент. А калі б быў без флікера, зусім быў бы незаўважным, -- кажа старшы інспектар ДПС Дзмітрый Міснік.
За ім -- ледзь заўважны сілуэт мужчыны, і ён без свяцільнага элемента:
-- Згодзен, правілы дарожнага руху парушыў, сёння надзеў іншую куртку, але абяцаю выправіцца, -- кажа пешаход інспектару ДПС Дзмітрыю Залатуху.
На першы раз -- прафілактычная гутарка, другая падобная прыпынак можа пагражаць штрафам.
Пад'язджаем да населенага пункта, і веру, што тут жывуць дысцыплінаваныя грамадзяне, якія носяць святлоадбівальныя элементы.
Прыемна было сустрэць невялікую групу школьнікаў, хоць у гэты час былі канікулы. Усе яны без выключэння пазначаны флікерамі. За імі ішлі дзеці з установы адукацыі -- і за іх мы таксама парадаваліся. Адчуваецца, што настаўнікі шмат увагі надаюць гэтаму пытанню.

Успомнілі ў гэту раннюю раніцу і пра пасажырскія перавозкі. Хочацца адзначыць, што за 15 хвілін міма мяне ў Лепелі праехала больш за 10 машын таксі. Аказваецца,

іх паслугамі лепельчане карыстаюцца вельмі актыўна.
Так, Алег Афанасьеў у гэтай сферы працуе паўгода, мае стаж 20 гадоў. Калі ў яго пацікавілася, як ставіцца да пешаходаў без флікера, катэгарычна адказаў: «Дрэнна!»
-- Калі ў гадзіну-пік едзеш, а гэта ў асноўным час перад працай, пешаходы часта перабягаюць дарогу, не звяртаючы ўвагу на транспарт. Даводзіцца ўглядацца. Калі ж чалавек з флікерам, такіх праблем няма, -- адказаў таксіст.
Па вуліцы Дэпаўскай інспектары пагутарылі з лепельчанінам Сяргеем Курашом, які таксама спяшаўся на працу. Яму праваахоўнікі параілі перайсці на іншы бок, каб рухацца насустрач транспарту, які рухаецца, і не выкарыстоўваць навушнікі на ажыўленых вуліцах.
З усімі забыўкамі супрацоўнікі ДАІ правялі прафілактычную гутарку і расказалі, чым пагражае такое легкадумнае стаўленне да ўласнай бяспекі.
Па вуліцы Барысаўскі тракт у Лепелі заўважаем веласіпедыста. Фара гарыць, бачна здалёк, але чамусьці, заўважыўшы транспартны сродак ДПС, мужчына павялічыў хуткасць і згарнуў у завулак. «Напэўна, усё ж нешта парушыў», -- падумалася мне.
Нагадваем, што пры руху па дарозе ў цёмны час сутак або пры яе недастатковай бачнасці на веласіпедзе або мопедзе павінны быць уключаны: спераду — фара (ліхтар), якая выпраменьвае белае святло, ззаду — ліхтар, які выпраменьвае чырвонае святло. Пры гэтым па-за населенымі пунктамі веласіпедыст павінен быць апрануты ў адзенне павышанай бачнасці са святлоадбівальнымі элементамі (за выключэннем руху па веласіпеднай дарожцы).
Нагадаем і пра флікеры! Яны дазваляюць убачыць пешахода ў святле фар за 400 метраў. Гэта адлегласць, якая дае магчымасць своечасова скінуць хуткасць аўтамабіля. Нямала ДТЗ з удзелам пешаходаў адбываюцца з-за таго, што кіроўцы не паспяваюць заўважыць чалавека ў цемры, затармазіць або аб'ехаць яго. Для прадухілення падобных няшчасных выпадкаў якраз і прызначаны святлоадбівальныя элементы.
Наталля Храпавіцкая.