20 верасня, Віцебск /Дзіяна Курыло - БЕЛТА/. Супрацоўнікі ДАІ прадухілілі незаконны вываз з Беларусі жытняй мукі на Br110,6 млн., паведамілі карэспандэнту БЕЛТА ў аддзяленні інфармацыі і грамадскіх сувязей УУС Віцебскага аблвыканкама. На аўтадарозе Полацк - Вялікія Лукі ў вёсцы Краснаполле Расонскага раёна супрацоўнікі міжраённага аддзела ДАІ УУС па абслугоўванні Полацка, Наваполацка і Полацкага раёна затрымалі тры велікагрузныя аўтамашыны пад кіраваннем жыхароў Віцебска і Полацка. У кожнай з машын знаходзілася ў сярэднім па 21 т жытняй мукі, якую дзельцы спрабавалі вывезці на тэрыторыю Расійскай Федэрацыі. Пры гэтым дакументаў, якія пацвярджаюць праходжанне фітасанітарнага кантролю, не мелася. Наваполацкім УДФР КДК па Віцебскай вобласці складзены тры адміністрацыйныя пратаколы па арт.12.17 ч.4 КоАП РБ. Дадзеная частка артыкула цягне пакаранне ў выглядзе накладання штрафу на індывідуальнага прадпрымальніка або юрыдычную асобу ў памеры ад трыццаці да пяцідзесяці базавых велічынь (у цяперашні час базавая велічыня складае Br100 тыс.) з канфіскацыяй тавараў незалежна ад таго, у чыёй уласнасці яны знаходзяцца, выручкі, атрыманай ад рэалізацыі тавараў, выканання работ, аказання паслуг, або без канфіскацыі. Груз канфіскаваны. Яго агульны кошт ацэньваецца ў Br110,6 млн.-0-

БЕЛТА