Судзельніцтва ў лёсе

Юбілей адзначыла Лепельская пярвічная арганізацыя «Беларускае таварыства інвалідаў па зроку». Ёй споўнілася 65 гадоў. З дня ўтварэння грамадскага аб'яднання «БелТІЗ» мінула і таго больш — 90 гадоў.

Свята пачалося ўжо ў фае – з дэгустацыі прадукцыі філіяла «Лепельскі хлебазавод» РУВП «Віцебскхлебпрам». Далей усіх чакаў канцэрт, падрыхтаваны актывістамі самой пярвічкі. Вядома, госці прыйшлі на юбілей не з пустымі рукамі. Намеснік старшыні райвыканкама Мікалай Нікіцін узнагародзіў Ганаровымі граматамі Валянціну Кісель, Генадзя Матырку, Дзяніса Аблаушку і Сяргея Марціновіча. Ад Фонду міру начальнік аддзела ідэалагічнай работы, культуры і па справах моладзі райвыканкама Ігар Урбан уручыў лупы. Сем актыўных удзельнікаў спартыўных мерапрыемстваў граматамі адзначыў дырэктар фізкультурна-аздараўленчага цэнтра Рымантас Стрыпейкіс. А тэлефон і бісер у падарунак пярвічнай арганізацыі падарылі даўнія сябры – цэнтральная раённая бібліятэка. Сумесна з ёй пярвічная арганізацыя ГА «БелТІЗ» правяла ўжо не адно мерапрыемства, ды і яшчэ не адно наперадзе.

Сярод «юбілейных сюрпрызаў» была і бытавая тэхніка. Цяпер інваліды па зроку могуць не толькі разагрэць прынесеную з дома ежу ў мікрахвалёўцы, якую падарыла ААТ «Лепельскі МКК», але і прыгатаваць абед у электрапечы – такі падарунак зрабіла КУП ДРАЦ «Жамчужына». Новыя два мікрафоны, электронны гадзіннік з прыёмнікам – парадавалі «юбіляра» і гэтымі карыснымі рэчамі. А 15 актывістаў пярвічкі атрымалі і асабістыя падарункі – мабільныя тэлефоны. Разам з падзякамі іх уручыў старшыня Віцебскай абласной арганізацыі ГА «БелТІЗ» Канстанцін Ламчаноўскі. Падзякамі і грашовымі прэміямі адзначыў ён і валанцёраў пярвічкі.

ГА «БелТЗЗ» -- гэта шэсць абласных арганізацый, якія ўключаюць у сябе 142 пярвічкі і больш за 19 тысяч інвалідаў па зроку. ГА «БелТЗЗ» з'яўляецца ўласнікам 14 унітарных прадпрыемстваў, на якіх працуе звыш сямі тысяч чалавек, з іх – больш за тры тысячы – інваліды па зроку. Прамысловасць ГА «БелТЗЗ» спецыялізуецца на выпуску электратэхнічнай прадукцыі, фільтраэлементаў для аўтатрактарнай прамысловасці, вырабаў дрэваапрацоўкі і прадстаўляе шырокую наменклатуру тавараў народнага спажывання.

Сваё жыццё кіпіць і ў раённай арганізацыі. Створанае ў цяжкія пасляваенныя гады таварыства інвалідаў па зроку спачатку ўключала ў сябе 27 чалавек. Цяпер гэтая лічба дасягнула 86. За гады існавання лепельская пярвічка не раз прызнавалася лепшай. Ідзе час, укараняюцца новыя формы працы, аднак іх асноўная мэта – стварэнне роўных умоў для людзей з абмежаванымі магчымасцямі – застаецца нязменнай. Да прыкладу, зараз дзейнічаюць адначасова некалькі праектаў. Так, праект «Добрыя сябры» аб'ядноўвае ініцыятыўныя групы розных пакаленняў. У межах праекта «Судзельніцтва ў лёсе» людзі з абмежаванымі магчымасцямі, не выходзячы з чытальнай залы цэнтральнай раённай бібліятэкі, «падарожнічаюць» па Лепельшчыне. Традыцыйнымі ўжо сталі скайп-канферэнцыі з расійскімі сябрамі – моладзева-інфармацыйным цэнтрам горада Балахна Ніжагародскай вобласці. У адной з апошніх сустрэч расіяне пахваліліся, што па прыкладзе лепельчан ужо зрабілі свой міні-тэатр. Валанцёраў аб'ядноўвае іншы праект – «Ад сэрца да сэрца». Дапамагчы навесці парадак да Вялікадня – адно з найбліжэйшых запланаваных у яго межах мерапрыемстваў.

М. АРЛОВА