Прэзідэнт Беларусі Аляксандр Лукашэнка ўручыў дзяржаўныя ўзнагароды заслужаным дзеячам розных сфер, шматдзетным маці, а таксама генеральскія пагоны прадстаўнікам вышэйшага афіцэрскага складу
Прэзідэнт Беларусі Аляксандр Лукашэнка ўручыў дзяржаўныя ўзнагароды заслужаным дзеячам розных сфер, шматдзетным маці, а таксама генеральскія пагоны прадстаўнікам вышэйшага афіцэрскага складу. Урачыстая цырымонія адбылася сёння ў Палацы Незалежнасці, перадае карэспандэнт БЕЛТА.
"Мабыць, самая прыемная прэзідэнцкая місія - уручаць узнагароды заслужаным людзям, быць сярод тых, хто штодзённай працай робіць Беларусь мацнейшай і прыгажэйшай, а жыццё беларусаў - бяспечнейшай і багацейшай", - прызнаўся кіраўнік дзяржавы ў пачатку цырымоніі. Яна традыцыйна прайшла напярэдадні свята - Дня жанчын і адрозніваецца асаблівай атмасферай урачыстасці і душэўнасці. "Яе ствараеце вы, жанчыны, сваімі ўсмешкамі, прыгажосцю, абаяваннем. А бляск і цудоўны выгляд Палацу Незалежнасці надаюць парадныя мундзіры нашых вайскоўцаў", - сказаў беларускі лідар.
Удзельнікамі цырымоніі сталі больш за 30 чалавек - прадстаўнікі арміі і сілавых структур, а таксама шматдзетныя маці і жанчыны, якія дасягнулі вялікіх прафесійных вышынь. "Такі гендэрны баланс - гэта не пераймальніцтва заходніх трэндаў. Высокі статус людзей у пагонах у нашай краіне і паважлівае, беражлівае стаўленне да жанчыны - абсалютна базавыя каштоўнасці беларускага грамадства", - падкрэсліў Прэзідэнт.
"Свету не бывае без тых, хто служыць народу і ўмее яго абараняць. Мы добра памятаем, хто захаваў нам свабоду 75 гадоў таму. Беларусы ўдзячныя ветэранам за іх подзвіг і шануюць гераічнае пакаленне нашых бацькоў і дзядоў. З упэўненасцю магу сказаць, што дзеці і ўнукі салдат-пераможцаў годныя іх", - канстатаваў кіраўнік дзяржавы. У якасці прыкладу ён прывёў учынак супрацоўніка ўпраўлення Міністэрства па надзвычайных сітуацыях капітана ўнутранай службы Алега Бойнічава. Ён разам з таварышамі, рызыкуючы жыццём, прадухіліў выбух на чыгунцы: калі з рэек сышлі некалькі цыстэрнаў з выбухованебяспечным газам, ён здолеў ліквідаваць уцечку. "Такія мужныя і адважныя людзі сёння берагуць мір і спакой беларусаў. Гонар ім і слава!" - падкрэсліў Прэзідэнт.
Словы асаблівай удзячнасці Аляксандр Лукашэнка адрасаваў шматдзетным маці, якія выбралі для сябе цяжкую, але вельмі патрэбную для краіны місію. "Я б сказаў: надзвычай важную і патрэбную, - удакладніў Прэзідэнт. - Вы клапоціцеся не толькі пра сваіх дзяцей. Вы даяце жыццё новым пакаленням, дорыце надзею на паспяховае будучае і працвітанне ўсёй нацыі. Бо якім яно будзе, шмат у чым залежыць ад вас, дарагія жанчыны. Ведаю, што большасць з вас не толькі шчаслівыя ў сям'і, але і адбыліся як спецыялісты на прафесійным ніве. Гэта ўдвая выдатна".
Узнагароды і ганаровыя званні кіраўнік дзяржавы ўручыў таксама жанчынам, якія маюць высокія дасягненні ў галіне культуры, мастацтва, навукі і педагогікі. "Ведаем і цэнім ваш уклад у выхаванне моладзі, захаванне духоўнай спадчыны і маральных каштоўнасцей", - адзначыў Аляксандр Лукашэнка.
Прэзідэнт павіншаваў беларускіх спартсменак з бліскучымі перамогамі на чэмпіянатах свету і Еўропы, за якія яны ўдастоены высокага звання "Заслужаны майстар спорту".
"Дзякуй за ўсё, што вы робіце для краіны і нашага народа, – звярнуўся кіраўнік дзяржавы да прысутных. – Напярэдадні цудоўнага вясновага свята самыя цёплыя віншаванні хачу адрасаваць жанчынам нашай Беларусі. Прыміце мае шчырыя пажаданні здароўя, шчасця і дабрабыту. Жадаю вам галоўнага – міру і дабра".
"Яшчэ раз віншую вас з высокімі ўзнагародамі – мужчын, нашых цудоўных жанчын не толькі з узнагародамі, званнямі, але і з наступаючым святам. Будзьце шчаслівыя! І хай дзеці, якіх вы нарадзілі не толькі для сябе, а для нашай суверэннай незалежнай Беларусі, радуюць заўсёды вас і радуюць вашу краіну. Шчасця вам!" – сказаў напрыканцы кіраўнік дзяржавы.
Ордэнам Пашаны ўзнагароджана кіраўнік вытворчай брыгады ў раслінаводстве сельгаспрадпрыемства "Гіркі" Варанецкага раёна Марыя Козіч.
За выхаванне пяці і больш дзяцей Аляксандр Лукашэнка ўручыў ордэны Маці. Сярод узнагароджаных – мастак-грымёр Нацыянальнай дзяржаўнай тэлерадыёкампаніі Вольга Арэшава-Каменская і выхавальнік у Сароцкіх яслях-садзе Любанскага раёна Наталля Мамайка.
Прысвоена таксама шэраг ганаровых званняў. Сярод узнагароджаных – салістка балета Кацярына Алейнік, якой прысвоена званне "Заслужаны артыст Рэспублікі Беларусь", дэкан факультэта педагогікі і псіхалогіі дзяцінства Магілёўскага дзяржаўнага ўніверсітэта імя А.А.Куляшова Ірына Камарова ўдастоена ганаровага звання "Заслужаны работнік адукацыі Рэспублікі Беларусь".
Ганаровыя званні таксама прысвоены супрацоўнікам Акадэміі МУС: заслужанага работніка адукацыі Беларусі – прафесару кафедры беларускай і замежных моў Святлане Дзянісавай, заслужанага супрацоўніка органаў унутраных спраў – начальніку кафедры тэорыі і гісторыі дзяржавы і права Вадзіму Паўлаву.
Сярод удастоеных ганаровага звання "Заслужаны майстар спорту Рэспублікі Беларусь" – спартсмен-інструктар нацыянальнай каманды, міліцыянер атрада міліцыі асаблівага прызначэння галоўнага ўпраўлення ўнутраных спраў Мінскага гарвыканкама Таццяна Мацко і спартсмен-інструктар нацыянальнай каманды, трэнер спартыўнай каманды МУС Святлана Цімашэнка.
Генеральскія пагоны Прэзідэнт уручыў намесніку камандзіра войскамі Заходняга аператыўнага камандавання Узброеных Сіл Беларусі Ігару Дзямідзенку, начальніку факультэта Генеральнага штаба Узброеных Сіл – намесніку начальніка Ваеннай акадэміі Беларусі Сяргею Зайцаву, начальніку ўпраўлення КДБ па Брэсцкай вобласці Сяргею Гладышаву, начальніку ўпраўлення ваеннай контрразведкі КДБ Канстанціну Кучынскаму, начальніку ўпраўлення ўнутраных спраў Магілёўскага аблвыканкама Ігару Шчарбачэню.
Традыцыйна для ўдзельнікаў урачыстасці была арганізавана экскурсія па Палацу Незалежнасці. Прадугледжаны таксама прыём ад імя кіраўніка дзяржавы ў форме фуршэта.