14 мая, Мінск /Кар. БЕЛТА/. Прэзідэнт Беларусі Аляксандр Лукашэнка 14 мая прыняў са справаздачай старшыню праўлення Нацыянальнага банка Пятра Пракаповіча, паведамілі БЕЛТА ў прэс-службе беларускага лідара. Кіраўніку дзяржавы даложана, што ўсе асноўныя паказчыкі грашова-крэдытнай палітыкі за 4 месяцы бягучага года выкананы ў поўным аб'ёме, дасягнута стабілізацыя на фінансавых рынках. Па словах Пятра Пракаповіча, асабліва важна, што ў гэтым годзе захоўваецца стабільнасць курса нацыянальнай валюты. Фактычна на сённяшні дзень у параўнанні з пачаткам года гэты паказчык да кошыка з трох замежных валют застаецца нязменным, прытым што назіраюцца рэзкія ваганні ўнутры кошыка паміж еўра і доларам. У першым квартале ў краіне палепшылася сітуацыя з экспартам тавараў і паслуг, які павялічыўся на 29% у параўнанні з такім жа перыядам мінулага года. У краіну паступіла валютнай выручкі больш на $455 млн., чым у першым квартале 2009 года. Як вынік, узраслі золатавалютныя рэзервы, якія па стане на 1 мая складаюць у нацыянальным вызначэнні $6 млрд. 515 млн. Гэта амаль на $550 млн. больш, чым было на 1 студзеня гэтага года. Такая тэндэнцыя ўмацоўвае ўпэўненасць, што стабільнасць нацыянальнай валюты будзе захоўвацца, паколькі яна заснавана на паляпшаючыхся выніках працы эканомікі. Кіраўнік Нацыянальнага банка праінфармаваў Прэзідэнта, што крэдытаванне эканомікі ідзе ў поўным аб'ёме, прычым на эфектыўныя праекты. На 1 мая запазычанасць па крэдытах рэальнага сектара эканомікі ўжо дасягнула Br71 трлн., і ў параўнанні з 1 мая 2009 года адзначаецца рост крэдытнай запазычанасці на 32%. Важна, што ў цяперашні час маюцца магчымасці і ў банкаўскай сістэмы для павелічэння крэдытавання. Упершыню за апошнія паўтара года фактычна дасягнута дастатковая ліквіднасць банкаўскай сістэмы. Пётр Пракаповіч падкрэсліў важнасць таго, што ўсе банкі пачалі выконваць рэкамендацыі Нацыянальнага банка па зніжэнні працэнтных ставак. У прыватнасці, працэнтныя стаўкі па зноў выдадзеных крэдытах у сакавіку зменшыліся ў параўнанні з лютым на 1,1%. Кіраўнік Нацбанка выказаў надзею, што рэкамендацыі па выхадзе ставак па крэдытах на ўзровень 5% у чэрвені будуць забяспечаны. Такім чынам, будзе завершана праца па дасягненні такога ж узроўню працэнтных ставак па крэдытах, якія былі ў дакрызісны перыяд, - стаўка рэфінансавання плюс 3%.