13 сакавіка, Мінск /Кар. БелТА/. Праўленне Нацыянальнага банка Беларусі прыняло рашэнне аб зніжэнні стаўкі рэфінансавання на 1,5 працэнтнага пункта да 28,5% гадавых з 13 сакавіка 2013 года. Аб гэтым паведамілі карэспандэнту БелТА ва ўпраўленні інфармацыі і грамадскіх сувязей Нацбанка.
"Апошні раз стаўка рэфінансавання зніжалася ў верасні 2012 года. Яе захаванне на ўзроўні 30% гадавых на працягу 6 месяцаў дазволіла забяспечыць ступень жорсткасці манетарных умоў, неабходную для падтрымання макраэканамічнай збалансаванасці і дасягнення мэтавых арыенціраў па зніжэнні ўзроўню інфляцыі", - адзначылі ў Нацыянальным банку.
Фактычнае складанне ў лютым бягучага года і прагназуемае далейшае запаволенне інфляцыйных працэсаў дае падставы для паступовага зніжэння намінальнага значэння стаўкі рэфінансавання з захаваннем яе станоўчага рэальнага ўзроўню.
"Такім чынам, па-ранейшаму захоўваюцца прывабныя ўмовы для зберажэнняў у беларускіх рублях, якія забяспечваюць іх надзейную абарону ад інфляцыі і перавышэнне даходнасці ў параўнанні з дэпазітамі ў замежнай валюце", - сказалі ў Нацыянальным банку.
Стаўку рэфінансавання ў 2013 годзе плануецца знізіць да 13-15% гадавых. Разам з тым, як неаднаразова заяўлялі прадстаўнікі Нацбанка, дынаміка стаўкі рэфінансавання будзе залежаць ад макраэканамічнай сітуацыі, у першую чаргу, ва знешнім гандлі і на валютным рынку, а таксама ад узроўню фактычнага складання інфляцыі. Інфляцыя ў Беларусі за два месяцы бягучага года склала 4,3% (у лютым - 1,2%) пры прагнозе на 2013 год не больш за 12%.
Акрамя таго, з 13 сакавіка па рашэнні Камітэта па манетарнай палітыцы Нацыянальнага банка зніжаюцца з 19% да 17% гадавых стаўкі па пастаянна даступных аперацыях вываду ліквіднасці, а таксама з 35% да 33% гадавых стаўкі па двухбаковых аперацыях падтрымкі бягучай ліквіднасці банкаў. Разам з тым стаўкі па пастаянна даступных аперацыях падтрымкі бягучай ліквіднасці банкаў застаюцца без змен - на ўзроўні 50% гадавых.-0-