24 кастрычніка, Мінск /Кар. БЕЛТА/. Стратэгія развіцця геалагічнай галіны да 2025 года распрацавана ў Беларусі. Дакумент сёння прадставіў міністр прыродных рэсурсаў і аховы навакольнага асяроддзя Уладзімір Цалко на пасяджэнні дзяржсавета па пытаннях комплекснага выкарыстання мінеральнай сыравіны, якое прайшло пад старшынствам прэм'ер-міністра Міхаіла Мясніковіча, перадае карэспандэнт БЕЛТА. "Стратэгія заклікана стаць асновай доўгатэрміновага планавання дзейнасці навуковых і вытворчых арганізацый у сферы вывучэння нетраў і іх асваення", - растлумачыў Уладзімір Цалко. Дакумент прадугледжвае тры этапы. На першым - 2013-ы год - плануецца распрацоўка першачарговых нарматыўна-прававых і эканамічных механізмаў развіцця галіны, а таксама ўдасканаленне навуковага забеспячэння геалагічных работ. На другім этапе - 2014-2015 гады - прадугледжваецца распрацоўка і зацвярджэнне дзяржпраграмы "Дзяржгеакарта" маштабам 1:2000, заснаванай на ўжо наяўнай інфармацыі па глыбокім свідраванні, а таксама на новых даных з беларускага спадарожніка. На трэцім этапе - 2016-2025 гады - у выніку ўвядзення абноўленай нарматыўна-прававой базы і новых эканамічных механізмаў па павышэнні прывабнасці інвесціравання ў геалагічныя работы прадугледжваецца выхад галіны на новы ўзровень развіцця. "Гэта дазволіць зрабіць яе канкурэнтаздольнай на сусветным рынку геалагічных паслуг, у першую чаргу ў краінах СНД, Паўднёва-Усходняй Азіі, Афрыкі", - растлумачыў міністр. У адпаведнасці са стратэгіяй, плануецца істотна павялічыць фінансаванне геолагаразведачных работ, у тым ліку шляхам прыцягнення замежных інвестыцый. Да выканання дакумента плануецца прыступіць ужо ў наступным годзе. Адной з галоўных мэт стратэгіі стане рост геалагічнай вывучанасці тэрыторыі Беларусі, перш за ўсё шляхам пашырэння рэгіянальных даследаванняў. Большасць матэрыялаў у гэтай сферы ўжо састарэлі і патрабуюць абнаўлення.