Стратэгія поспеху: Лепельскі лясгас занесены на абласную Дошку гонару па выніках працы за 2024 год

Лепельскі лясгас што ні год, то ў лідарах. 2025-ы не стаў выключэннем. Дабівацца высокіх вынікаў для лясгаса — не разавы тактычны ход, а стратэгія. У чым сакрэт поспеху, даведалася карэспандэнт «ВВ».

Хутка ў Лепельскім лясгасе адбудзецца адкрыццё абноўленага адміністрацыйнага будынка, рэканструкцыя якога была адной з галоўных задач для кіраўніцтва, бо стварэнне камфортных умоў працы – прыярытэтны напрамак развіцця ўстановы. Дырэктар лясгаса Андрэй Барадзіч надае гэтаму асаблівую ўвагу: маладым спецыялістам і допытлым работнікам, якія маюць патрэбу ў паляпшэнні жыллёвых умоў, выдзяляецца арэнднае жыллё, павышаецца заработная плата.