11 красавіка, Віцебск /Вольга Багачова - БЕЛТА/. Прадпрыемствам будаўнічага комплексу неабходна правесці аналіз эфектыўнасці сваёй дзейнасці. Такое меркаванне выказаў сёння журналістам падчас наведвання Завода буйнапанэльнага домабудавання РУП "Віцебскі ДСК" намеснік прэм'ер-міністра Беларусі Анатоль Калінін, перадае карэспандэнт БЕЛТА. "Кіраўнікам прадпрыемстваў будаўнічага комплексу варта сур'ёзна правесці аналіз сістэмы затрат (энерг-, рэсурса-, матэрыялаёмістасць), паглядзець па эфектыўнасці, даць ацэнку ўласнай працы", - сказаў Анатоль Калінін, падкрэсліўшы, што шмат станоўчых прыкладаў сярод прадпрыемстваў будаўнічага комплексу ў Беларусі ўжо існуе, і гэты вопыт трэба распаўсюдзіць. Закранаючы мэту сваёй паездкі ў Віцебскую вобласць, віцэ-прэм'ер адзначыў, што яна звязана з неабходнасцю азнаямлення з працай прадпрыемстваў будаўнічага комплексу, камунальных прадпрыемстваў усіх галін - дарожных, аўтатранспартных і інш. Плануецца наведванне больш за 10 прадпрыемстваў рэгіёну, у тым ліку ААТ "Даламіт", Віцебскага рачнога порта. "Наша задача - азнаёміцца з сітуацыяй і праблемамі, якія існуюць у гэтых галінах, аказаць дзейсную дапамогу. Пры гэтым убачанае дазволіць нам прыняць правільнае кіраўніцкае рашэнне на ўзроўні ўрада", - адзначыў Анатоль Калінін, дадаўшы, што ў групе, якая знаходзіцца ў цяперашні час у Віцебскай вобласці, працуе таксама міністр архітэктуры і будаўніцтва Анатоль Нічкасаў і іншыя спецыялісты Саўміна. Сярод першых прадпрыемстваў, наведаных сёння рабочай групай у Наваполацку, сталі "Будаўніча-мантажны трэст №16, г.Наваполацк", ПРУП "Наваполацкжалезабетон" і адно з аўтатранспартных прадпрыемстваў горада. "Першыя два прадпрыемствы не выклікалі вялікага станоўчага ўражання, трэцяе - пакінула станоўчыя эмоцыі, таму мы парэкамендавалі кіраўніцтву папярэдніх прадпрыемстваў арыентавацца на яго эканоміку, стратэгію, маркетынг і менеджмент", - падзяліўся сваімі ўражаннямі Анатоль Калінін. Ён таксама звярнуў увагу, што аналізам на большасці прадпрыемстваў займаюцца кіраўнікі вышэйшага звяна. "Калі казаць пра лінейных работнікаў, тых, хто складае і памнажае эканоміку, то, на жаль, у аналізе яны ўдзельнічаюць у меншай ступені", - канстатаваў віцэ-прэм'ер.