На Віцебшчыне плануецца ўзвесці тры касцёлы, два з іх павінны з'явіцца ў Віцебску і адзін - у Паставах. Пра гэта паведаміў журналістам віцебскі біскуп Алег Буткевіч, перадае карэспандэнт БЕЛТА.
На Віцебшчыне плануецца ўзвесці тры касцёлы, два з іх павінны з'явіцца ў Віцебску і адзін - у Паставах. Пра гэта паведаміў журналістам віцебскі біскуп Алег Буткевіч, перадае карэспандэнт БЕЛТА.
"На гэты момант ёсць планы па будаўніцтве двух касцёлаў у Віцебску - гэта адраджэнне храма Святога Антонія і будаўніцтва касцёла ў новым віцебскім мікрараёне Білева. У Паставах будзе ўзведзены касцёл Езуса Міласэрнага. Гэта перспектыва бліжэйшых 2-4 гадоў", - сказаў Алег Буткевіч.
Асабліва віцебскі біскуп спыніўся на адраджэнні ў цэнтральнай частцы Віцебска (насупраць ратушы) касцёла Святога Антонія. "Важная і вельмі адказная справа. Так як часткова на тым месцы, дзе гістарычна знаходзіўся храм, зараз праезная частка, вызначана зона для магчымага размяшчэння святыні. Ужо выканана частка праектных работ, - растлумачыў Алег Буткевіч. - Неабходна атрымаць дазвол рэспубліканскіх службаў і ведамстваў. А для гэтага, у тым ліку, мы павінны гарантаваць хуткае будаўніцтва храма. Зараз працуем над тым, каб знайсці сродкі на будаўніцтва. Гэта цэнтр горада і тут нельга расцягваць будаўніцтва на доўгі час. Так што галоўная задача - знайсці грошы на адраджэнне святыні".
Пацікавіліся журналісты ўражаннямі біскупа ад сустрэчы з Папам Рымскім Францыскам, падчас якой пантыфіку была паднесена яго кніга "Імя Бога - Міласэрнасць" у перакладзе на беларускую мову. "Кожная сустрэча з такім чалавекам пакідае вельмі яркія ўражанні і застаецца ў памяці надоўга, - сказаў Алег Буткевіч. - Апошняя сустрэча адбылася не так даўно. Папа Францыск вельмі збянтэжыўся падарункам. Сказаў, што яму вельмі прыемна, што на беларускай мове з'явіўся пераклад яго кнігі".
Акрамя гэтага, Алег Буткевіч паведаміў, што сёлета будзе працягнута традыцыя арганізацыі прамых трансляцый святочных службаў у касцёле. Так, 24 снежня Тэлерадыёкампанія "Віцебск" будзе весці прамую трансляцыю з касцёла Святога Духа. "Так што тыя людзі, якія не маюць магчымасці асабіста наведаць урачыстае набажэнства, змогуць убачыць яго па тэлебачанні", - падкрэсліў біскуп.