Падпісаны акт уводу ў эксплуатацыю Віцебскай гідраэлектрастанцыі. Пра гэта паведаміў журналістам міністр энергетыкі Уладзімір Патупчык, які прыняў удзел ва ўрачыстым мерапрыемстве з нагоды запуску новай электрападстанцыі ў Пастаўскім раёне Віцебскай вобласці, перадае карэспандэнт БЕЛТА.
"У гэтыя хвіліны адбылася яшчэ адна важная падзея для нашай энергасістэмы - быў падпісаны акт уводу Віцебскай ГЭС. Гэта знакавы аб'ект, які мы таксама пабудавалі разам з кітайскімі партнёрамі. Самая буйная гідраэлектрастанцыя беларускай энергасістэмы, магутнасцю 40 МВт", - сказаў міністр.
Магутнасцей Віцебскай ГЭС дастаткова, каб забяспечыць электраэнергіяй спажыўцоў Віцебскага раёна. Яе праца знізіць спажыванне экспартуемага прыроднага газу, што дазволіць павысіць энергетычную бяспеку краіны.
Да рэалізацыі інвестыцыйнага праекта "Будаўніцтва Віцебскай ГЭС на рацэ Заходняя Дзвіна Віцебскай вобласці" РУП "Віцебскэнерга" прыступіла ў 2010 годзе. Генеральным падрадчыкам будаўніцтва выступала замежная падрадная арганізацыя "Кітайская нацыянальная карпарацыя па электраабсталяванні" (CNEEC). Абслугоўваннем аб'екта на этапе будаўніцтва сумесна са спецыялістамі РУП "Віцебскэнерга" займаліся прадстаўнікі кампаніі CNEEC, чыё абсталяванне ўстаноўлена на ГЭС. Усяго ж на аб'екце былі задзейнічаны больш за дзесятак праектных, будаўнічых і электратэхнічных арганізацый.
Праект складаецца з трох частак. Асноўныя аб'екты будаўніцтва - гідравузел, які складаецца з чатырох гідраагрэгатаў магутнасцю 10 МВт кожны, схема выдачы магутнасці ў энергасістэму і вадасховішча. Пабудаваны будынкі і збудаванні гідравузла, водазліўной плаціны, земляной плаціны, АРУ-110кВ і суднаходны шлюз.
Чаканы гадавы выпрацоўка электраэнергіі складзе 138 млн кВт·г. Абслугоўваць новую станцыю будзе каля 30 чалавек.