У Наваполацку 16 кастрычніка на базе Полацкага дзяржаўнага ўніверсітэта адбудзецца абласны этап рэспубліканскага конкурсу "Студэнт года - 2019", паведамілі БЕЛТА ў Віцебскім абласным камітэце БРСМ.
Адборачныя этапы прайшлі ва ўсіх вышэйшых навучальных установах рэгіёна і выклікалі вялікую цікавасць у студэнтаў. У інтэлектуальных і творчых конкурсах збяруцца дзевяць найлепшых студэнтаў Віцебскай вобласці. Яны прадставяць Віцебскі дзяржаўны ўніверсітэт імя П.М. Машэрава, Віцебскую дзяржаўную акадэмію ветэрынарнай медыцыны, Віцебскі філіял Міжнароднага ўніверсітэта "МИТСО", Віцебскі дзяржаўны тэхналагічны ўніверсітэт, Полацкі дзяржуніверсітэт і Віцебскі дзяржаўны медуніверсітэт.
Усе ўдзельнікі абласнога тура конкурсу атрымаюць прызы ад партнёраў, а пераможца - турыстычную пуцёўку па маршруце Талін-Рыга-Стакгольм. Таксама найлепшы студэнт прадставіць Віцебскую вобласць у рэспубліканскім фінале "Студэнта года - 2019".
Арганізатарамі спаборніцтва выступілі абласны камітэт Беларускага рэспубліканскага саюза моладзі пры падтрымцы галоўнага ўпраўлення ідэалагічнай работы і па справах моладзі аблвыканкама і ВНУ Віцебскай вобласці.