30 мая, Мінск /Кар. БЕЛТА/. Беларусь мае патрэбу ў здольных і энергічных людзях. Аб гэтым 30 мая, сустракаючыся з навучэнцамі, студэнтамі і прадстаўнікамі таленавітай моладзі, заявіў Прэзідэнт Беларусі Аляксандр Лукашэнка. Аб гэтым карэспандэнту БЕЛТА паведамілі ў прэс-службе беларускага лідара. Паводле слоў кіраўніка дзяржавы, таленавітыя людзі з'яўляюцца лакаматывам сусветнай гісторыі. "Беларуская зямля багата слаўнымі імёнамі. Іх спадчына - унікальныя помнікі дойлідства, шэдэўры навуковай думкі, літаратуры і мастацтва - з'яўляюцца нашай духоўнай апорай і прадметам нацыянальнага гонару, - адзначыў Прэзідэнт Беларусі. - Сёння наша краіна мае патрэбу ў здольных і энергічных людзях. Грандыёзныя планы могуць быць рэалізаваны толькі тымі, хто генеруе новыя ідэі і ўвасабляе іх у жыццё. Падтрымка талентаў - інвестыцыі ў будучыню". Як адзначыў Аляксандр Лукашэнка, у кожным дзіцяці закладзена сваё дараванне, і важна своечасова яго ўбачыць і падтрымаць. "Менавіта для гэтага ў Беларусі створана эфектыўная сістэма работы, якая дазваляе ў поўнай меры раскрыць і развіць здольнасці дзяцей і маладых людзей. Любы талент можа разлічваць на адрасную, мэтанакіраваную падтрымку і ўвагу з боку дзяржавы", - падкрэсліў Прэзідэнт Беларусі. Кіраўнік дзяржавы адзначыў, што дзясяткі алімпіяд, фестываляў і конкурсаў даюць шырокія магчымасці, каб праявіць сябе. У гэтым годзе да іх дадаліся яшчэ два тэлевізійныя праекты - "Дзеці новага пакалення" і "Я спяваю!", якія адкрылі яркія імёны, якімі краіна па праву можа ганарыцца. Пры падтрымцы дзяржавы ў краіне расце годная навуковая і творчая змена, якая з гонарам прадстаўляе краіну за мяжой. Лепшае пацвярджэнне таму - 26 узнагарод высокай пробы, заваяваных летась беларускімі школьнікамі на міжнародных алімпіядах. Паспяховымі былі і выступленні прадстаўнікоў Беларусі на моладзевых Дэльфійскіх гульнях, Сабінаўскім музычным фестывалі, конкурсе "Дзіцячая новая хваля" і іншых прэстыжных творчых спаборніцтвах. "Краіна дае ўсім вам унікальныя стартавыя магчымасці. Распарадзіцеся імі з карысцю як для сябе, так і для сваёй Айчыны. Няхай вашы медалі і прызы прынясуць з часам рэальную карысць Беларусі", - пажадаў Аляксандр Лукашэнка ўдзельнікам мерапрыемства.