Грамадскае аб'яднанне «Беларускі фонд міру» – адзін са старэйшых і аўтарытэтнейшых грамадскіх рухаў краіны, які на аснове добраахвотных узносаў і ахвяраванняў падтрымлівае, арганізуе і праводзіць антываенныя і міратворчыя акцыі, ажыццяўляе шырокую прапагандысцкую і інфармацыйна-тлумачальную работу. Мэтамі дзейнасці БФМ з'яўляюцца ўмацаванне міру, дружбы, узаемаразумення і згоды паміж людзьмі і народамі, прапаганда і ўвасабленне ў жыццё ідэй міласэрнасці і гуманізму.
Высока ацаніў дзейнасць аб'яднання старшыня Віцебскага абласнога Савета дэпутатаў Уладзімір Церанцьеў.
– Сёння шмат арганізацый, якія займаюцца пытаннямі захавання памяці, працы з моладдзю і старэйшым пакаленнем, сацыяльнай падтрымкі. Але Фонд міру праяўляе сябе ва ўсіх гэтых напрамках найбольш ярка, – адзначыў Уладзімір Церанцьеў. – За ўвесь час існавання ён рэалізаваў шмат праектаў, а ў апошні час праяўляе сябе ўсёабдымна – і ў рабоце па ўвекавечанні памяці загінуўшых воінаў, усталяванні мемарыялаў, аказанні садзейнічання міратворцам, выхаванні моладзі. Дзякуючы ініцыятыве фонду 12 школ міру працуе ў рэгіёнах. Праект «Апека» накіраваны на працу з людзьмі, якім не хапае ўвагі і ўдзелу. Фонд міру можна назваць адным са слупоў нашага грамадзянскага грамадства.
Крыніца: vitebsk-region.gov.by