ТЭАТР «#ДВАКРЫЛА»: ПАДВОДЗІМ ВЫНІКІ ПРАЕКТА!

У студзені 2023 года згодна з распараджэннем Прэзідэнта Рэспублікі Беларусь Аляксандра Лукашэнкі ад 30 снежня 2022 года №248рп 50 спецыялістам, якія працуюць у сферах навукі, адукацыі, аховы здароўя, культуры, маладзёжнай палітыкі і ўнеслі значны ўклад у іх развіццё, былі прызначаны гранты на 2023 год.

У спісе ініцыятыўных і таленавітых людзей апынулася і Святлана Стэльмах, педагог-арганізатар установы адукацыі «Лепельскі дзяржаўны аграрна-тэхнічны каледж», якая распрацавала і ўкараніла праект «#ДваКрыла». Накіраваны ён на стварэнне трох інклюзіўных тэатральных спектакляў патрыятычнай тэматыкі (з суправаджэннем тыфлакаментатара), а мэта -- удасканаленне сістэмы патрыятычнага выхавання маладых людзей з асаблівасцямі псіхафізічнага развіцця.
Падвесці вынікі мы папрасілі ініцыятара і распрацоўшчыка праекта Святлану Стэльмах.
— Год праляцеў вельмі хутка, і праект інклюзіўнага тэатра «#ДваКрыла» прыйшоў да фінішу. У склад групы ўвайшлі навучэнцы Лепельскага аграрна-тэхнічнага каледжа, людзі з інваліднасцю па зроку ТЦСАН Лепельскага раёна і прадстаўнікі ГА «БелТІЗ» па Лепельскім раёне.
Мы ўпэўнены, што поспех нашага праекта па захаванні і прасоўванні культурнай спадчыны і ўцягванні ў валанцёрскую дзейнасць навучэнцаў каледжа «#ДваКрыла» залежыць не толькі ад згуртавання двух калектываў, але і ад таго, з якой душой і з якім настроем мы будзем аказваць далейшую падтрымку людзям з інваліднасцю.
Наш вопыт паказаў, што мерапрыемствы, якія мы праводзім, з кожным разам удасканальваюцца і радуюць людзей. Вочы ўдзельнікаў і гледачоў загараюцца тым забытым агеньчыкам любові і цяпла. А мы самі адчуваем не толькі пачуццё гордасці, але і велізарнае задавальненне ад зробленай працы і жаданне працягваць валанцёрскую дзейнасць, дарыць людзям з інваліднасцю клопат, любоў і ўвагу, якіх ім так не хапае ў паўсядзённым жыцці. Упэўнена, наш праект будзе жыць і развівацца.
Так, напрыклад, міні-спектакль з тыфлакаментаваннем «Голас Хатыні» тэатра «#Два крыла» быў паказаны не толькі для лепельчан, але і ў Барысаве. Барысаўчане

пазнаёміліся з калектывам падчас 16-га міжрэгіянальнага фестывалю творчасці інвалідаў «Зорка надзеі». Там тэатр выступаў з пастаноўкай «Не забараняй сабе марыць», якая выклікала ў гледачоў сапраўдны фурор. «Голас Хатыні» выклікаў эмоцый не менш. Дзеянне на сцэне атрымалася яркім і эмацыянальным, расчуліла гледачоў да слёз. Асаблівы драматычны каларыт спектаклю, вядома, надалі музыка і песні.
Яркім пацвярджэннем прафесіяналізму Святланы Стэльмах і яе каманды з'яўляецца і тое, што інклюзіўны тэатр «#ДваКрыла» у чэрвені мінулага года прыняў удзел у Міжнародным конкурсе-фестывалі мастацтваў у Маскве «Вершыня таленту» і стаў лаурэатам 1 ступені.
Усяго праведзена 50 мерапрыемстваў, з іх 4 спектаклі “Голас Хатыні”, 2 спектаклі “А зоры тут ціхія”, 1 спектакль “Прыгоды Цмока”. Напярэдадні 9 мая гэтага года адбудзецца прэм'ера спектакля “Бабанькі”.
— Святлана Анатольеўна, не шкадуеце, што пачалі гэту грандыёзную працу?
— Вядома, не. Заняткі любімай справай заўсёды прыносяць задавальненне і абавязкова камусьці прынясуць радасць. Такім для мяне і навучэнцаў каледжа з'яўляецца праект «#ДваКрыла». Гэта частка майго жыцця, прычым адна з самых яркіх!
А для людзей з інваліднасцю ўдзел у праекце спрыяе пашырэнню кола зносін, развіццю сацыяльных навыкаў і павышэнню якасці жыцця. Для валанцёраў жа, упэўнена, дапамога іншым стала неад'емнай часткай іх жыцця.

Наталля Храпавіцкая. Газета "Лепельскі край"