Тыражы выдадзеных кніг на беларускай мове выраслі ў Беларусі ў 2015 годзе на 17%. Пра гэта паведаміла сёння на прэс-канферэнцыі міністр інфармацыі Лілія Ананіч, перадае карэспандэнт БЕЛТА.
Тыражы выдадзеных кніг на беларускай мове выраслі ў Беларусі ў 2015 годзе на 17%. Пра гэта паведаміла сёння на прэс-канферэнцыі міністр інфармацыі Лілія Ананіч, перадае карэспандэнт БЕЛТА.
Па словах міністра, гэта агульная тэндэнцыя ўвагі да тэмы нацыянальнай кнігі, "як раз тое, што павінна адрозніваць нацыянальнае кнігавыданне". Увага да кніг беларускіх аўтараў, да гістарычнай тэматыкі, нацыянальнай культуры, кніг беларускіх пісьменнікаў як сучасных, так і класікаў - усё гэта запатрабавана ў грамадстве і дзяржаве.
Усяго ў Беларусі за мінулы год выдадзена 10 тыс. 273 найменні кніг і брашур агульным тыражом 21 млн 550 тыс. экзэмпляраў.
Як адзначыла Лілія Ананіч, нягледзячы на аб'ектыўную тэндэнцыю зніжэння цікавасці да чытання ва ўсім свеце, Беларусь па колькасці найменняў выдадзеных кніг страціла не так шмат, як гэта магло б быць. Страты склалі крыху больш за 10%. Па тыражы адбылося падзенне на 30%. Гэта сведчыць аб больш узважанай рэдакцыйна-выдавецкай палітыцы. Яшчэ адным тлумачэннем з'яўляецца сыход расійскага партнёра "АСТ", які выдаваў тут рускамоўную кнігу. Доля рынку выдавецтва "Харвест", якое прадстаўляла ў Беларусі "АСТ", займае зараз толькі 2%, хоць раней доля даходзіла да 50%.
Беларуская кніга паспяхова прадстаўлялася ў мінулым годзе на міжнародных выстаўках у Маскве, у Франкфурце. Таксама кніжныя экспазіцыі выстаўляліся на нацыянальных выстаўках краіны, прамысловага, аграрнага напрамку.