Тры даўгабуды ўведзены ў эксплуатацыю ў Віцебскай вобласці ў канцы жніўня

12 верасня, Віцебск /Алена Ціханава - БЕЛТА/. Тры даўгабуды ўведзены ў эксплуатацыю ў Віцебскай вобласці ў канцы жніўня. Ключы ад доўгачаканых кватэр атрымаюць дальшчыкі Віцебска, Наваполацка і Оршы. Аб гэтым паведаміў карэспандэнту БЕЛТА начальнік аддзела кантролю будаўнічага комплексу і жыллёва-камунальнай гаспадаркі КДК Віцебскай вобласці Анатоль Званцоў.

У выніку дадаткова прынятых мер КДК і Дзяржбуднаглядам у канцы жніўня бягучага года было завершана будаўніцтва 96-кватэрнага жылога дома №22 у мікрараёне Білева-2 у Віцебску. Будаўніцтва аб'екта было пачата ў канцы 2010 года і працягвалася 34 месяцы. У дадзеным выпадку нарматыўны тэрмін будаўніцтва (10,5 месяцаў) быў перавышаны амаль у тры з паловай разы.

"Будаўніцтва гэтага дома (як і суседняга №24, які быў здадзены ў эксплуатацыю ў канцы ліпеня) Віцебскі домабудаўнічы камбінат вёў у аварыйным рэжыме. На пляцоўках была арганізавана праца ў некалькі змен з прыцягненнем дадатковых працоўных рэсурсаў. У такой сітуацыі вельмі важна было не дапусціць фактаў некваліфікаванага выканання работ. Завяршэнне будаўніцтва вялося пад жорсткім кантролем спецыялістаў КДК і інспекцыі Дэпартамента па кантролі і наглядзе за будаўніцтвам па Віцебскай вобласці. Усе недахопы, выяўленыя ў працэсе будаўніцтва, на момант прыёмкі былі выпраўлены", - сказаў Анатоль Званцоў.

Ён таксама падкрэсліў, што 58-кватэрны даўгабуд у Наваполацку планавалася ўвесці ў эксплуатацыю ў ліпені. "На момант меркаванай прыёмкі на аб'екце меліся значныя недаробкі, як у кватэрах, так і ў месцах агульнага карыстання. У такім выглядзе дом прымаць у эксплуатацыю было нельга. Спецыялісты КДК і Дзяржбуднагляду настаялі на тым, каб дом быў здадзены толькі пасля ўстаранення недаробак. Канчаткова работы на аб'екце былі завершаны ў канцы жніўня. Будаўніцтва жылога дома ў Оршы вялося больш раўнамерна і стабільна. Даўгабуд уведзены ў эксплуатацыю дакладна ў тэрміны, устаноўленыя аблвыканкамам", - растлумачыў начальнік аддзела.-0-