31 мая, Мінск /Кацярына Нячаева - БЕЛТА/. Цяжкіх падлеткаў, якія за год здзейснілі адміністрацыйныя правапарушэнні тры разы ці больш, прапануецца накіроўваць на перавыхаванне ў спецыяльныя вучэбна- і лячэбна-выхаваўчыя ўстановы сістэмы Мінадукацыі. Пра гэта паведаміў сёння журналістам намеснік начальніка ўпраўлення прафілактыкі МУС Аляксандр Сароковік, перадае карэспандэнт БЕЛТА. Прапанова аб пашырэнні катэгорыі падлеткаў, якіх варта накіроўваць на перавыхаванне ў спецустанову, змяшчаецца ў законапраекце аб унясенні паправак у закон аб асновах сістэмы прафілактыкі безнагляднасці і правапарушэнняў непаўналетніх. Дакумент ужо прыняты ў першым чытанні Палатай прадстаўнікоў. Паводле даных МУС, на ўліку ў інспекцыі па справах непаўналетніх знаходзяцца каля 14 тыс. падлеткаў, у тым ліку каля 1,5 тыс. чалавек, асуджаных да мер пакарання, звязаных з ізаляцыяй ад грамадства, а таксама амніставаных, якія вярнуліся з выхаваўчых калоній, спецвучэльняў закрытага тыпу. "Па выніках мінулага года гэтай катэгорыяй здзейснена 957 крымінальна каральных дзеянняў. У 2010 годзе з 342-х падлеткаў, якія тры і больш раз прыцягваліся за здзяйсненне правапарушэнняў, 109 чалавек пасля здзейснілі злачынствы", - сказаў Аляксандр Мелешка. Напрыклад, аднаго з падлеткаў у 2010 годзе 22 разы прыцягвалі да адміністрацыйнай адказнасці за правапарушэнні, здзейсненыя ў стане алкагольнага ап'янэння. У выніку яму паставілі дыягназ алкагольная залежнасць. Іншага падлетка тройчы прыцягвалі да адказнасці за дробнае хуліганства і распіццё алкаголю ў грамадскіх месцах, а ў выніку асудзілі за забойства. Магчыма, калі б іх накіравалі ў спецустановы, трагедый удалося б пазбегнуць. Прадстаўнік МУС лічыць, што накіраванне цяжкіх падлеткаў на перавыхаванне дазволіць дамагчыся большых поспехаў па зніжэнні ўзроўню падлеткавай злачыннасці. Хоць і цяпер ёсць пэўныя дасягненні ў гэтым напрамку. Так, у апошнія гады назіраецца ўстойлівая тэндэнцыя зніжэння колькасці злачынстваў, здзейсненых падлеткамі. Удзельная вага такіх злачынстваў на працягу шэрагу гадоў складае каля 5%. Штогод змяншаецца колькасць цяжкіх і асабліва цяжкіх злачынстваў з удзелам непаўналетніх, у тым ліку здзейсненых імі ў стане алкагольнага і наркатычнага ап'янэння, падлеткамі з судзімасцю і ў групах.