У Віцебску будуць развіваць фігурнае катанне: у перспектыве бліжэйшых гадоў у горадзе з'явяцца цэнтр фігурнага катання на каньках і закрытая трэніравальная лядовая арэна. Аб спартыўных аб'ектах расказаў сёння на прэс-канферэнцыі першы намеснік старшыні Віцебскага аблвыканкама Алег Мацкевіч, перадае карэспандэнт БЕЛТА.
Ініцыятарам будаўніцтва трэніравальнай арэны выступіла беларуска-чэшскае прадпрыемства ТАА "Айс Ринг Тэхнолоджы". У Віцебскай вобласці гэта будзе першая закрытая лядовая арэна, пабудаваная на сродкі прыватнай кампаніі і прыцягнутых інвестыцый. Агульны кошт праекта складзе каля 2 млн еўра. У цяперашні час праект інвестдамовы праходзіць узгадненне, таксама вядуцца перадпраектныя работы.
Плануецца, што лядовую арэну, якая ўяўляе сабой шматфункцыянальны спартыўна-трэніравальны комплекс з круглагадовым рэжымам работы, пабудуюць у 2021 годзе. Пры праектаванні аб'екта будуць улічаны ўсе самыя сучасныя тэхналогіі, асаблівасці трэніравальнага працэсу спартсменаў самага высокага ўзроўню.
У склад комплексу ўвойдуць лядовая пляцоўка, кафэ, харэаграфічныя і трэнажорныя залы, аснашчаныя спецыяльнымі трэнажорамі, якія развіваюць пачуццё раўнавагі. Асаблівай увагі заслугоўвае тэхналагічны складнік праекта арэны - комплексная інтэграваная сістэма падрыхтоўкі, транспарціроўкі і ўтылізацыі энергёрэсурсаў, якая дазваляе дамагчыся значнай эканоміі і рацыянальнага расходу рэсурсаў пры эксплуатацыі будынка. Тэхналогія ў 7-8 разоў знізіць затраты на эксплуатацыю арэны ў параўнанні з аналагічнымі аб'ектамі.
Яшчэ адной важнай асаблівасцю лядовай пляцоўкі стане магчымасць аператыўна змяняць тэмпературны рэжым лядовага пакрыцця. Для прафесійных фігурыстаў дадзеная характарыстыка - ключавая пры адпрацоўцы найбольш складаных элементаў.
Паралельна на базе будучай трэніровачнай лядовай арэны будзе створаны Цэнтр фігурнакатання Наталлі Бесцям'янавай і Ігара Бабрына. Знакамітыя спартсмены, якія прысутнічалі на прэс-канферэнцыі, падкрэслілі, што гатовыя ўзяць на сябе ўсе пытанні па арганізацыі трэніровачнага працэсу, асабіста кантраляваць гэту працу, а таксама падабраць трэнерскія кадры. Плануецца, што гэта будуць дасведчаныя трэнеры-выкладчыкі і харэографы, прыцягнутыя ў тым ліку і з Расіі. "Не радзей аднаго разу на месяц, калі трэба, то і часцей, мы будзем прыязджаць сюды, займацца арганізацыяй усяго трэніровачнага працэсу, кансультаваць і праводзіць сумесныя трэніроўкі, - падкрэсліла Наталля Бесцям'янава. - Наша мэта - стварэнне сучаснай прафесійнай школы фігурнакатання ў Віцебску з выкарыстаннем перадавых методык і тэхналогій падрыхтоўкі спартсменаў".
Набор юных спартсменаў у групы пачатковай падрыхтоўкі плануецца правесці ўжо ў верасні 2020 года. І калі на дадзены момант фігурным катаннем у Віцебску маюць магчымасць займацца каля 40 дзяцей, то з рэалізацыяй праекта іх колькасць павялічыцца да 200. Як адзначыла старшыня Федэрацыі фігурнакатання Віцебскай вобласці Святлана Галашкіна, асноўнымі фактарамі, якія стрымліваюць развіццё фігурнакатання ў Віцебску, з'яўляюцца недахоп лёду і досведнага трэнерскага складу. "Дадзены праект дазволіць вырашыць гэтыя праблемы", - упэўнена яна.
У вольны ад трэніровак па фігурным катанні час арэна будзе выкарыстоўвацца для заняткаў іншымі відамі спорту, правядзення спаборніцтваў рознага ўзроўню і масавых катанняў на каньках. У загружанасці аб'екта ўдзельнікі праекта не сумняваюцца, бо магутнасці дзеючага гарадскога Палаца спорту загружаны на 166%. Яго лёд выкарыстоўваецца нават у пазапрацоўны час.
Алег Мацкевіч выказаў упэўненасць, што праект стане магутным стымулам для развіцця фігурнакатання ў Віцебску і пашырыць магчымасці моладзі для заняткаў зімовымі відамі спорту. Акрамя таго, ён з'яўляецца яркім прыкладам эфектыўнага дзяржаўна-прыватнага партнёрства, бо адным з удзельнікаў праекта з'яўляецца СААТА "Натывіта". Кампанія з 2017 года за ўласныя сродкі рэалізуе праект па падтрымцы таленавітай моладзі ў галіне навукі і спорту "Таленавіта", а таксама аказвае спонсарскую дапамогу Федэрацыі пляжнага футбола і Федэрацыі фігурнакатання Віцебскай вобласці.-0-
Навіны Беларусі (БЕЛТА)