Уборка ўраджаю – адзін з найважнейшых этапаў сельскагаспадарчых работ. Як нам расказалі ў АДАІ Лепельскага РАУС, з гэтай мэтай у раённым аддзеле міліцыі са складу супрацоўнікаў розных падраздзяленняў створана рабочая група. Штодня яны выязджаюць у сельгас-арганізацыі для маніторынгу ўборачнай кампаніі. Перад праваахоўнікамі стаіць задача правядзення агляду ўсёй аўтамабільнай і сельскагаспадарчай тэхнікі з мэтай вызначэння яе наяўнасці і спраўнасці, высвятлення прычын разукамплектавання і знаходжання ў непрацоўным стане працяглы час. Супрацоўнікі нацэлены на выяўленне і спыненне фактаў бясгаспадарнасці з боку кіраўнікоў і матэрыяльна адказных асоб арганізацый, вывучэнне абгрунтаванасці расходавання паліўна-матэрыяльных каштоўнасцей, недахопаў па забеспячэнні захаванасці новага ўраджаю.
Супрацоўнікі ДАІ ў сваю чаргу забяспечваюць бяспеку дарожнага руху. Нярэдка тэхніка сельскагаспадарчых арганізацый эксплуатуецца без праходжання дзяржаўнага тэхагляду, з няспраўнымі святлавымі прыборамі і г. д. Хоць кіраўнікам прадпрыемстваў АПК вядома, што за выпуск у эксплуатацыю транспартнага сродку, які мае няспраўнасці, пры наяўнасці якіх яго эксплуатацыя забаронена, або не прайшоў тэхагляд і працэдуру выдачы дазволу на яго допуск да ўдзелу ў дарожным руху, прадугледжаны штраф у памеры ад 4 да 6 базавых велічынь. Акрамя таго, надаецца ўвага праходжанню вадзіцелямі і механізатарамі штодзённага перадрэйсавага кантролю. Парушэнні ў гэтым выпадку цякуць адміністрацыйную адказнасць. У першы раз штраф складзе ад 8 да 45 базавых велічынь, у другі – ад 15 да 50-ці.
Рэйды праходзяць штодня. Практыка паказвае, што, дзякуючы менавіта штодзённаму маніторынгу, значна змяншаецца колькасць парушэнняў працоўнай дысцыпліны, у тым ліку знаходжання на працоўным месцы ў стане алкагольнага ап'янення, фактаў дробнага крадзяжу, незаконнага абарачэння нафтавага вадкага паліва, парушэнняў правілаў транспарціроўкі збожжа.