18 снежня, Віцебск /Дзіяна Курыла - БЕЛТА/. Удзельная вага нафтахімічнай галіны ў агульным аб'ёме прамысловай вытворчасці Віцебскай вобласці працягвае скарачацца і да 2015 года павінна дасягнуць 33,5%. Такі загад паставіў сёння на сесіі Віцебскага абласнога Савета дэпутатаў старшыня Віцебскага аблвыканкама Аляксандр Косінец, перадае карэспандэнт БЕЛТА. Удзельная вага нафтахімічнай прамысловасці ў 2008 годзе складала 54,5%, на долю вытворчасці электраэнергіі тады прыпадала 11%. Такім чынам, амаль дзве траціны прамысловай вытворчасці рэгіёну залежалі ад імпартнай сыравіны, што рабіла эканоміку рэгіёну ўразлівай ад знешніх фактараў. З 2009 года дзякуючы мерапрыемствам па рэалізацыі праграмы інавацыйнага развіцця рэгіёну імпульс да развіцця атрымалі апрацоўчая прамысловасць, машынабудаванне, перапрацоўчыя прадпрыемствы. Па папярэдніх даных 2012 года, удзельная вага нафтахімічнай прамысловасці склала 49,7%, доля харчовай прамысловасці павялічылася да 13,6%. Да 2015 года ўдзельная вага нафтахіміі прагназуецца на ўзроўні 33,5%, прадпрыемстваў энергетыкі - 10% з улікам крыніц на мясцовых відах паліва. Такім чынам, дыверсіфікацыя прамысловасці адпавядае тэхнакратычным прынцыпам: атрымліваюць развіццё радыёэлектроніка, праграмаванне. Для атрымання высокага дабаўленага кошту неабходна працягнуць мадэрнізацыю прамысловасці, падкрэсліў губернатар. Перад прадпрыемствамі вобласці ў наступным годзе стаіць задача давесці індэкс фізічнага аб'ёму да бягучага года на ўзроўні 120%, рэнтабельнасць павінна скласці 12%, знізіць матэрыялаёмістасць на 5%, выручка на аднаго працуючага складзе не менш за $70 тыс.-0-

БЕЛТА