11 снежня, Віцебск /Дзіяна Курыло - БЕЛТА/. Новая схема фінансавання медустаноў у Віцебскай вобласці ў 2012 годзе ўкараняецца, паведаміў карэспандэнту БЕЛТА начальнік упраўлення аховы здароўя Віцебскага аблвыканкама Юрый Дзеркач. Паводле яго слоў, упершыню бюджэтныя сродкі будуць размяркоўвацца зыходзячы не толькі з колькасці насельніцтва, замацаванага за медустановай, але і з узроўню і аб'ёмаў аказання дапамогі. Для вызначэння апошніх паказчыкаў на працягу 2011 года ўпраўленне аховы здароўя праводзіла маніторынг, дзе і якую дапамогу атрымлівалі жыхары рэгіёну: лячыліся яны ў раённых, абласных ці рэспубліканскіх бальніцах. У выніку гэтага ўжо вызначаны пералік устаноў, уключаючы раённыя бальніцы, якім прадугледжваецца павялічыць фінансаванне прыкладна на 20%. Як лічыць Юрый Дзеркач, такая схема дазволіць стымуляваць лячэбныя ўстановы развіваць сучасныя віды аказання медыцынскай дапамогі і зробіць яе даступнай, незалежна ад таго, у горадзе ці вёсцы жыве чалавек. Са свайго боку ўпраўленне аховы здароўя мае намер працягваць працу па тэхнічным аснашчэнні раённых бальніц. Так, з пяці лапараскапічных стоек, якія паступілі ў вобласць у бягучым годзе, дзве перададзены ў раённыя бальніцы - у Новалукомль і Лепель. У цяперашні час хірургі гэтых устаноў асвойваюць малаінвазіўныя аперацыі, што дазволіць пацыентам атрымліваць высокатэхналагічную медыцынскую дапамогу, не выязджаючы за межы свайго раёна. У раённых бальніцах ужо асвойваюць эндапратэзаванне суставаў, для мясцовых лабараторый закуплены біяхімічныя і гематалагічныя аналізатары. Упраўленне аховы здароўя мае намер у 2012 годзе працягнуць маніторынг аказання меддапамогі. Пры гэтым нават вынікі двух-трох месяцаў могуць стаць падставай для таго, каб пераразмеркаваць сродкі на карысць найбольш эфектыўна працуючых устаноў. Паводле папярэдніх даных, з кансалідаванага бюджэту вобласці на патрэбы аховы здароўя ў 2012 годзе будзе накіравана Br1,8 трлн.-0-

БЕЛТА