Першы пункт праграмы рабочай паездкі — наведванне малочна-таварнага комплексу і малочна-таварнай фермы ААТ «Праземле-Агра» — аграпрамысловага прадпрыемства Чашніцкага раёна.
Мэта наведвання — паўторны кантроль гаспадарак, якія ўжо інспектаваліся групай дэпутатаў у канцы лютага.
У гэтым годзе перад сельгасвытворцамі Беларусі стаяць сур'ёзныя задачы. Ім неабходна атрымаць не менш за 11 млн. тон збожжавых, больш за 9 млн. тон малака і 2 млн. тон мяса. Для аграрыяў Чашніцкага раёна гэта задача няпростая, улічваючы, што ў раёне больш за 20 ферм пабудовы 60-70-х гадоў.
Ігар Сяргейка азнаёміўся з тым, як прайшла ў гаспадарцы зімоўка буйной рагатай жывёлы, як ідуць справы з арганізацыяй яе кармлення і ўтрымання, выкананнем ветэрынарна-санітарных правілаў і тэхналагічнай дысцыпліны.
Акрамя таго, Старшыня Палаты прадстаўнікоў праверыў стан сельскагаспадарчай тэхнікі і пагутарыў з механізатарамі.
Якасць утрымання жывёлы і ўмовы захоўвання кармоў здавальняючыя. Гатоўнасць тэхнікі да веснавых палявых работ складае 97,3 працэнта, што перавышае паказчык па раёне.