Паслуга комплекснага дзённага догляду за пажылымі грамадзянамі пачала ўкараняцца ў Віцебскай вобласці на сістэмнай аснове, паведаміла карэспандэнту БЕЛТА начальнік упраўлення сацыяльнай падтрымкі насельніцтва і стацыянарных устаноў камітэта па працы, занятасці і сацыяльнай абароне аблвыканкама Вера Астапенка.
Укараненне паслугі ўжо пачалося ў шэрагу раёнаў вобласці: Аршанскім, Пастаўскім, Лёзненскім і некаторых іншых. Яна даступная і на даму, і ў аддзяленнях дзённага і кругласутачнага знаходжання, і ў іншых аддзяленнях. Распрацаваны пашпарт паслугі, вызначаны кошт за гадзіну. Індывідуальны комплекс дзённага догляду ўключае вялікі пералік, у прыватнасці, прадастаўленне спальнага месца (калі гаворка ідзе пра аддзяленне дзённага знаходжання), дапамогу ў побыце, у прыёме ежы, мыцці, пераапрананні, змене падгузніка, суправаджэнне на шпацыры, элементарная рэабілітацыя.
"Па сутнасці, гаворка ідзе пра магчымасць за пэўную плату забяспечыць комплексным пагадзінным доглядам пажылога чалавека, за якім няма каму ў гэты час прыгледзець. Напрыклад, чалавек выпісаны з бальніцы пасля інсульту, але ўсё яшчэ мае патрэбу ў доглядзе, або ў яго зламана шыйка сцягна, або сваякі вымушаны на час пакінуць без нагляду пажылога з дэменцыяй - сітуацыі бываюць розныя. Важны момант у тым, што мы робім акцэнт альбо на непрацуючых пенсіянераў, якія яшчэ не дасягнулі 60-гадовага ўзросту, альбо грамадзян у працэсе атрымання групы інваліднасці. Гэта значыць тых, хто мае патрэбу ў доглядзе, але яшчэ не можа атрымаць яго ў якасці гарантаванай дзяржавай сацыяльнай паслугі", - растлумачыла Вера Астапенка.