Ужо не адзін год валанцёрскі атрад аграрна-тэхнічнага каледжа «Добрае сэрца» дапамагае ветэрану Вялікай Айчыннай вайны Марыі Марусевіч. На гэты раз юныя лепельчане склалі дровы, хутка навядучы парадак на ўчастку.

Як расказала Марыя Фёдараўна, хлопцы за пару гадзін справіліся з працай, на якую ёй і двух тыдняў было б мала.

- Атрад у нас вялікі, хлопцы выходзяць на дапамогу тым, хто мае патрэбу, па чарзе, - пракаментавала педагог-арганізатар установы адукацыі Святлана Стэльмах. – А з Марыяй Фёдараўнай нас звязвае даўняе сяброўства.

У гады Вялікай Айчыннай вайны Марыя Фёдараўна служыла ў 2-й Ушацкай брыгадзе імя П. К. Панамарэнка, якая дзейнічала ва Ушацкім і Лепельскім раёнах. Працавала ў ваенным шпіталі, дапамагала параненым байцам. Часам выконвала разавыя заданні ў складзе групы сувязных.

Пасля заканчэння вайны працавала швачкай у камбінаце бытавога абслугоўвання Лепеля. Неаднаразова ўзнагароджвалася граматамі і падзякай за добрасумленную і шматгадовую працу.