28 лютага, Мінск /Кар. БЕЛТА/. У Беларусі пачаўся прызыў на тэрміновую ваенную службу, паведамілі БЕЛТА ў прэс-службе Мінабароны. Правядзенне мерапрыемстваў па прызыве грамадзян на тэрміновую ваенную службу пачалося ў адпаведнасці з указам ад 7 лютага 2012 года №46. Калі раней мерапрыемствы прызыву ажыццяўляліся ў красавіку-ліпені і кастрычніку-студзені, то з 2011 года яны перанесены на люты-май і жнівень-лістапад. Такім чынам, чарговы прызыў грамадзян на тэрміновую ваенную службу будзе ажыццяўляцца ў лютым - маі гэтага года. У цяперашні час ажыццяўляецца разлік камплектавання злучэнняў і воінскіх частак, распрацоўваюцца планы вывучэння, адбору і адпраўкі грамадзян на тэрміновую ваенную службу. Адбор у ваенных камісарыятах грамадзян пройдзе з 28 сакавіка па 11 мая. Адпраўка прызваных на тэрміновую ваенную службу адбудзецца з 15 па 29 мая. Усяго ў злучэнні і воінскія часткі Узброеных Сіл, іншыя войскі і воінскія фарміраванні для праходжання тэрміновай ваеннай службы плануецца накіраваць каля 10 тыс. чалавек. Прызыў на службу ў рэзерве ў лютым-маі гэтага года ажыццяўляцца не будзе. У адпаведнасці з законам Беларусі "Аб воінскім абавязку і воінскай службе" для грамадзян, якія праходзяць тэрміновую ваенную службу па прызыве, устаноўлены наступныя тэрміны ваеннай службы: для тых, хто не мае вышэйшай адукацыі - 18 месяцаў, якія маюць вышэйшую адукацыю - 12 месяцаў, якія прайшлі навучанне на ваенных кафедрах або факультэтах па праграмах падрыхтоўкі малодшых камандзіраў, якія здалі ўстаноўленыя праграмамі падрыхтоўкі экзамены, - 6 месяцаў. Такія тэрміны ў поўнай меры дазваляюць праводзіць неабходную падрыхтоўку прызваных на тэрміновую ваенную службу, лічаць у Мінабароны. Акрамя таго, законам аб воінскай службе вызначана катэгорыя грамадзян, якім прадастаўляюцца адтэрміноўкі ад прызыву на тэрміновую ваенную службу. Як правіла, найбольшая колькасць адтэрміновак ад прызыву прадастаўляецца для атрымання адукацыі.-0-

БЕЛТА