У Беларусі пачынаецца цэнтралізаванае тэсціраванне

13 чэрвеня, Мінск /Кар. БЕЛТА/. У Беларусі сёння пачынаецца асноўны этап уступнай кампаніі - цэнтралізаванае тэсціраванне. Сёння абітурыенты будуць праходзіць тэсціраванне па беларускай мове. Нагадаць, калі, куды і з чым прыходзіць на выпрабаванні, карэспандэнт БЕЛТА папрасіла дырэктара Рэспубліканскага інстытута кантролю ведаў (РІКВ) Міністэрства адукацыі Беларусі Мікалая Феськова. Дырэктар РІКВ падкрэсліў, што ўсім абітурыентам, асабліва замежным, пажадана прыбыць у пункт тэсціравання хаця б за 30 хвілін да пачатку экзамену. Выпрабаванні па ўсіх прадметах ва ўсе дні пачынаюцца адначасова ў 11.00. На адваротным баку пропуску на ЦТ пазначана дакладнае месцазнаходжанне пункта правядзення выпрабаванняў, яго адрас і нават маршруты гарадскога транспарту. Пры сабе неабходна мець пропуск, дакумент, які сведчыць асобу, ручку (гелевую або капілярную) з чарніламі чорнага колеру. Пры атрыманні экзаменацыйных матэрыялаў абітурыент павінен пераканацца ў адпаведнасці нумара варыянту бланка адказаў нумару варыянту педагагічнага тэсту. Мікалай Феськоў яшчэ раз папярэдзіў усіх удзельнікаў ЦТ аб тым, што выкарыстоўваць падчас выпрабаванняў розныя прылады сувязі катэгарычна забаронена. Абітурыенты, якія парушаць гэта патрабаванне, пакінуць аўдыторыю і будуць пазбаўлены магчымасці здаваць выпрабаванні. Уваход у будынкі, дзе праводзяцца тэст-выпрабаванні, усім, акрамя членаў камісіі і абітурыентаў, катэгарычна забаронены. Калькулятар (на ЦТ па хіміі і фізіцы) прыносіць можна, але толькі той, які не можа выступаць сродкам прыёму, захоўвання і перадачы інфармацыі. У гэтым годзе будзе захавана традыцыя дастаўкі матэрыялаў ЦТ у пункты правядзення выпрабаванняў фельчарскай службай. "Увесь матэрыял (бланкі адказаў, канверты і заданні), які падрыхтавалі супрацоўнікі РІКВ, будзе дастаўлены напярэдадні ў рэгіянальныя пункты тэсціравання пры дапамозе фельчарскай службы, і такім жа чынам адказы абітурыентаў будуць вернуты ў інстытут на праверку", - паведаміў Мікалай Феськоў. Тэсціраванне пройдзе з 13 па 27 чэрвеня. Першае выпрабаванне (па беларускай мове) пройдзе 13 чэрвеня. 14 чэрвеня абітурыенты здадуць рускую мову, 16 чэрвеня - біялогію, 17 чэрвеня - матэматыку, 19 чэрвеня - грамадазнаўства, 20 чэрвеня - хімію, 21 чэрвеня - сусветную гісторыю найноўшага часу, 23 чэрвеня - фізіку, 24 чэрвеня - гісторыю Беларусі, 26 чэрвеня - замежныя мовы, 27 чэрвеня - геаграфію.

Упершыню за шмат гадоў змяніліся лідары сярод прадметаў уступнай кампаніі. Калі ў папярэднія гады першай па колькасці абітурыентаў была матэматыка, то ў гэтым годзе яе месца заняла руская мова. Мову Пушкіна і Някрасава выказалі жаданне здаваць 95 тыс. 896 чалавек, а матэматыку - 95 тыс. 161 чалавек. Усяго жадаючых прайсці ЦТ больш за 141 тыс. чалавек. Паступаючыя ў вышэйшыя навучальныя ўстановы павінны здаць ЦТ па трох прадметах (за выключэннем уступных выпрабаванняў па прадметах "літаратура (руская, беларуская)", "творчасць", "фізічная культура", форма правядзення якіх вызначаецца прыёмнай камісіяй ВНУ). Гэта тэсты па беларускай або рускай мове (па выбары) і па двух прадметах у адпаведнасці з профілем (напрамкам) спецыяльнасці. Пры паступленні ў сярэднія спецыяльныя навучальныя ўстановы - па двух прадметах. Абітурыенты, якія былі зарэгістраваныя, але не з'явіліся на ЦТ па ўважлівых прычынах, маюць права прайсці яго ў рэзервовы дзень - 4 ліпеня. Для гэтага яны павінны з 27 чэрвеня па 1 ліпеня перарэгістравацца ў адным з пунктаў, якія забяспечваюць рэгістрацыю для ўдзелу ў ЦТ у рэзервовы дзень. Такімі з'яўляюцца Брэсцкі дзяржаўны тэхнічны ўніверсітэт, Віцебскі дзяржаўны тэхналагічны ўніверсітэт, Гомельскі дзяржаўны тэхнічны ўніверсітэт імя П.В.Сухога, Гродзенскі дзяржаўны ўніверсітэт імя Янкі Купалы, Беларуска-Расійскі ўніверсітэт, Беларускі дзяржаўны ўніверсітэт. Пунктам правядзення выпрабавання па ўсіх навучальных прадметах у рэзервовы дзень вызначаны Беларускі дзяржаўны ўніверсітэт. Інфармацыю аб выніках ЦТ можна будзе атрымаць у пункце тэсціравання (спісы на стэндах, на сайце ўстановы адукацыі, дзе будзе праходзіць тэсціраванне), а таксама на сайце РІКЗ. Акрамя таго, можна скарыстацца SMS-запытам.З мэтай выключэння магчымасці ўдзелу ў конкурсе абітурыентаў, якія маюць нізкі ўзровень падрыхтоўкі, устаноўлена ніжняя мяжа тэставага бала, з якой адзнака пры паступленні ў ВНУ будзе прызнавацца здавальняючай - 7 балаў. Станоўчае значэнне тэставага бала вызначалася з улікам аналізу вынікаў цэнтралізаванага тэсціравання за апошнія тры гады: працэнта выканання заданняў у тэстах і ўзроўню складанасці заданняў згодна са спецыфікацыямі па вучэбных прадметах, у адпаведнасці з якімі былі складзены тэставыя заданні. Такім чынам, у абітурыентаў, якія маюць у сертыфікатах ЦТ 1-6 балаў, дакументы ў ВНУ прымацца не будуць. Такія абітурыенты змогуць паступаць ва ўстановы сярэдняй спецыяльнай або прафесійна-тэхнічнай адукацыі. Сертыфікаты ЦТ атрымаюць усе абітурыенты, якія здалі яго на 1 бал і вышэй. Тыя, хто набраў 0 балаў, не атрымаюць сертыфіката, а значыць, будуць пазбаўлены права падаваць дакументы для ўдзелу ў конкурсе як у ВНУ, так і ў ССНУ.-0-

БЕЛТА