У Беларусі афіцыйная статыстыка даступная ўсім

У Беларусі афіцыйная статыстыка даступная ўсім: дзяржаве, бізнесу, партыям, грамадскім арганізацыям, сродкам масавай інфармацыі, жыхарам краіны розных узростаў. Пра гэта сказала карэспандэнту БЕЛТА старшыня Нацыянальнага статыстычнага камітэта Інна Мядзведзева.

Штогод 23 жніўня работнікі дзяржаўнай статыстыкі адзначаюць сваё прафесійнае свята.

На працягу многіх гадоў удасканальваўся працэс збору, апрацоўкі, аналізу і распаўсюджвання статыстычных даных. "Сёння мы ў поўнай меры выконваем найскладанейшыя задачы па маніторынгу сацыяльна-эканамічнага развіцця рэспублікі, - адзначыла кіраўнік Белстата. - У нас ёсць усе атрыбуты сучасных статыстычных сістэм: заканадаўства, суб'екты праваадносін у галіне дзяржаўнай статыстыкі, класіфікатары і статыстычная метадалогія, якая адпавядае міжнародным стандартам".

Паводле яе слоў, імклівае развіццё інфармацыйных тэхналогій аказвае ўсё большы ўплыў на метады збору інфармацыі. У цяперашні час 96% справаздачнасці паступае ад рэспандэнтаў у электронным фармаце. З 1 красавіка бягучага года ўведзены ў эксплуатацыю шматфункцыянальны вэб-партал Нацыянальнага статыстычнага камітэта, які забяспечвае інфармацыйную падтрымку рэспандэнтаў дзяржаўных статыстычных назіранняў. Цяпер рэспандэнт можа фарміраваць і прадстаўляць першасныя статыстычныя даныя па формах дзяржстатназіранняў у рэжыме анлайн, перад адпраўкай справаздачы самастойна ажыццяўляць кантроль. На вэб-партале таксама прадстаўлены функцыя персанальнага календара збору статыстычнай справаздачнасці і магчымасць працы ў фармаце асабістага кабінета з інфармаваннем аб дапушчаных парушэннях і атрыманнем іншых інфармацыйных паведамленняў.

Паводле слоў Інны Мядзведзевай, асноўнымі напрамкамі развіцця галіновай статыстыкі з'яўляюцца ўдасканаленне сістэмы статыстычных паказчыкаў і метадалогіі іх фарміравання, стварэнне і развіццё новых напрамкаў статыстыкі, якія дазваляюць праводзіць комплексны аналіз па актуальных аспектах развіцця краіны.

Напрыклад, у 2016 годзе Белстат перайшоў на новую афіцыйную методыку пабудовы паліўна-энергетычнага балансу, гарманізаваную з міжнароднымі стандартамі і верифікаваную экспертамі Міжнароднага энергетычнага агенцтва. Яна дазваляе выразна падзяліць сектары ў энергабалансе і значна павялічыць колькасць разлічваемых на яго аснове паказчыкаў энергаэфектыўнасці.

У мэтах удасканалення метадалагічнай асновы статыстыкі турызму і распрацоўкі статыстычнага інструментарыю для вызначэння ўкладу гэтай галіны ў эканоміку Белстат распрацаваў класіфікацыю прадуктаў і відаў эканамічнай дзейнасці ў сферы турызму, якая забяспечвае супастаўнасць вымярэнняў індыкатараў Дапаможнага рахунку турызму Рэспублікі Беларусь на міжнародным узроўні. Акрамя таго, праведзены новыя абследаванні турыстычных выдаткаў грамадзян Беларусі і замежнікаў, якія наведалі нашу краіну ў турыстычных мэтах. На аснове эксперыментальных разлікаў ужо атрыманы першыя ацэнкі ўкладу турыстычнай галіны ў развіццё эканомікі (па 2014 годзе). "Уклад турызму ў ВУП склаў 1,8%. Такі ж паказчык маюць Польшча, Літва, крыху больш у Швейцарыі", - сказала Інна Мядзведзева.

Беларусь уваходзіць у міжнародныя камісіі ў галіне статыстыкі. У 2016 годзе рэспубліка ўпершыню атрымала права стаць членам Кіраўнічага савета па Праграме міжнародных супастаўленняў краін - членаў ААН і прадстаўляць у ім СНД. Гэта міжнародны праект супастаўлення валавога ўнутранага прадукту і парытэтаў пакупніцкай здольнасці краін - членаў ААН. Важнай падзеяй з'яўляецца абранне членам Статыстычнай камісіі ААН тэрмінам на чатыры гады. Членства ў камісіі дазволіць прасоўваць інтарэсы дзяржавы пры прыняцці асновапакладных рашэнняў у сферы статыстыкі і дэманстраваць адкрытасць Беларусі да дыялогу і абмеркавання пытанняў, якія цікавяць міжнародную супольнасць. Беларусь стала пляцоўкай для правядзення розных семінараў па статыстыцы пад эгідай ААН, Еўрастата, Статыстычнага камітэта СНД.

Навіны Беларусі (БелТА)