12 кастрычніка, Мінск /Кар. БЕЛТА/. У Беларусі аплата жыллёва-камунальных паслуг будзе залежаць ад ступені даходаў грамадзян. Пра гэта заявіў намеснік прэм'ер-міністра Беларусі Анатоль Калінін падчас прамой лініі ў газеце "Рэспубліка", паведамляе карэспандэнт БЕЛТА. "Аплата ЖКП будзе залежаць ад ступені даходаў грамадзян, ёсць адпаведнае даручэнне кіраўніка дзяржавы. Мы зараз сумесна з Мінжылкамгасам і Мінпрацы і сацабароны выпрацоўваем меры, якія дазволілі б без шкоды для грамадзян з нізкімі даходамі ўсталяваць плату за жыллёва-камунальныя паслугі, набліжаныя да сабекошту", - адзначыў віцэ-прэм'ер, падкрэсліўшы, што гэта няпростае пытанне, рашэнне якога не ляжыць на паверхні. "Таму спачатку мы плануем увесці дыферэнцыраваныя тарыфы на аплату электраэнергіі, ацяплення і выкарыстання газу для ацяплення, што тычыцца выкарыстання газу на прыгатаванне ежы, механізм аплаты будзе ранейшы", - растлумачыў ён. Анатоль Калінін адзначыў, што ва Украіне ўжо некалькі гадоў ужываецца падобная практыка, а ў Расіі распрацаваны план мерапрыемстваў па пераходзе на дыферэнцыраваную аплату цяпла, вады, газу, электраэнергіі, якую плануюць укараніць на працягу двух гадоў. "Мы пакуль толькі ажыццявілі праект па дыферэнцыраванай аплаце водазабеспячэння, але ўжо сёння зразумела, што вынікі ў яго нядрэнныя: адбылося прыкметнае скарачэнне аб'ёмаў спажывання і павелічэнне аплаты з боку тых, хто спажывае ваду звыш нарматыву", - паведаміў намеснік прэм'ер-міністра. Паводле інфармацыі віцэ-прэм'ера, у цяперашні час рыхтуецца нарматыўны дакумент па ўвядзенні дыферэнцыраванай аплаты электраэнергіі. "Магчыма, гэта адбудзецца з 1 лістапада 2012 года. Хацелася б падысці да вырашэння гэтага пытання як мага прасцей для грамадзян: падняць тарыфы да сабекошту і выплачваць безнаяўныя жыллёвыя субсідыі тым грамадзянам, якія ў іх маюць патрэбу. Я лічу, што гэты варыянт больш разважлівы і справядлівы", - выказаў меркаванне Анатоль Калінін.