У Беларусі плануецца штогод на 1% зніжаць удзельную вагу шкодных і небяспечных працоўных месцаў

У Беларусі ў бліжэйшыя пяць гадоў плануецца штогод на 1% зніжаць удзельную вагу працоўных месцаў са шкоднымі і (або) небяспечнымі ўмовамі працы. Гэта прадугледжваецца канцэпцыяй дзяржаўнай праграмы "Сацыяльная абарона і садзейнічанне занятасці 2016-2020", паведамілі карэспандэнту БЕЛТА ў Міністэрстве працы і сацыяльнай абароны.

У 2016-2020 гадах мерапрыемствы па развіцці сістэмы аховы працы будуць рэалізаваны ў ходзе падкараграмы "Ахова працы", якая нацэлена на паляпшэнне ўмоў і аховы працы працаўнікоў, зніжэнне вытворчага траўматызму і прафесійнай захваральнасці.

Наяўнасць працоўных месцаў са шкоднымі і (або) небяспечнымі ўмовамі працы з'яўляецца адным з фактараў, якія стрымліваюць развіццё эканомікі, зніжаюць якасць працоўнага патэнцыялу і прадукцыйнасць працы. Удзельная вага шкодных і небяспечных працоўных месцаў у арганізацыях рэспублікі застаецца даволі высокай (у сярэднім каля 30% ад агульнай колькасці працоўных месцаў). Тэхнічнае перааснашчэнне і мадэрнізацыя вытворчасцей спрыяюць стварэнню здаровых і бяспечных умоў працы ў арганізацыях, паляпшэнню ўмоў працы працаўнікоў. Так, на гэтыя мэты ў мінулым годзе зрасходавана больш за Br30,8 трлн, што дазволіла палепшыць умовы працы на 40 тыс. 673 працоўных месцах са шкоднымі і (або) небяспечнымі ўмовамі працы. Гэтая праца будзе працягнута і ў далейшым. Гаворка ідзе аб павышэнні тэхніка-эканамічнага ўзроўню дзеючых вытворчасцей, цэхаў і участкаў на аснове ўкаранення перадавой тэхнікі і тэхналогій, механізацыі і аўтаматызацыі вытворчасці, мадэрнізацыі, замены састарэлага і фізічна зношанага абсталявання новым, больш прадукцыйным.

Дасягненню высокіх паказчыкаў у сферы бяспекі працы спрыяюць не толькі меры пакарання, але і меры маральнага і матэрыяльнага заахвочвання, адзначылі ў міністэрстве. Абедзве формы стымулявання могуць прымяняцца як на ўзроўні калектываў (падраздзяленняў) на конкурснай аснове, так і для канкрэтных работнікаў, адказных за арганізацыю і стан аховы і дысцыпліны працы. У апошнія гады значнае распаўсюджванне атрымала ўстанаўленне ў кантрактах, працоўных дагаворах, калектыўных дагаворах, палажэннях аб прэміраванні і іншых лакальных нарматыўных прававых актах канкрэтных мер стымулявання работнікаў да выканання патрабаванняў па ахове працы. Гэту практыку неабходна пашыраць: работнікі павінны быць зацікаўлены ў ліквідацыі або скарачэнні прафесійных рызык.

У сістэме прафілактычных мерапрыемстваў, накіраваных на забеспячэнне бяспечных умоў працы, важнае месца займаюць сродкі індывідуальнай абароны (СІЗ). Па словах спецыялістаў, неабходна ўдасканальваць нарматыўныя прававыя акты, якія ўстанаўліваюць патрабаванні да забеспячэння СІЗ работнікаў з улікам тэхнічнага рэгламенту Мытнага саюза "Аб бяспецы сродкаў індывідуальнай абароны", міждзяржаўных і дзяржаўных стандартаў.

Ва ўмовах мадэрнізацыі эканомікі пастаянна растуць патрабаванні да кваліфікацыі спецыялістаў па ахове працы. Навучанне, перападрыхтоўку і павышэнне кваліфікацыі працуючых па пытаннях аховы працы варта ўлічваць у ліку прыярытэтных мерапрыемстваў, накіраваных на паляпшэнне ўмоў і аховы працы. У першую чаргу гэта тычыцца занятых у найбольш траўманебяспечных відах дзейнасці - прамысловасці, будаўніцтве, сельскай гаспадарцы.

Паколькі большасць няшчасных выпадкаў на вытворчасці звязана з чалавечым фактарам, многія з іх можна пазбегнуць, карэктуючы паводзіны працуючых шляхам іх інфармавання. Гэтаму будуць спрыяць у тым ліку і месячнікі па ахове працы.

Навіны Беларусі (БЕЛТА)