1 лютага, Мінск /Алена Прус - БЕЛТА/. У Беларусі з лютага бягучага года растуць пенсійныя выплаты, паведамілі карэспандэнту БЕЛТА ў Міністэрстве працы і сацыяльнай абароны. Так, працоўныя пенсіі ў лютым у выніку пераліку будуць павялічаны ў сярэднім на 24%. Гэта павышэнне адчуюць звыш 2,4 млн. чалавек, якія атрымліваюць працоўныя пенсіі ў органах па працы, занятасці і сацыяльнай абароне. Нагадаем, у адпаведнасці з указам №35 "Аб павышэнні пенсій", пералікі працоўных пенсій у сувязі з ростам сярэдняй заработнай платы работнікаў у рэспубліцы ў 2012 годзе будуць ажыццяўляцца штоквартальна. Што тычыцца пераліку з 1 лютага гэтага года, то ён праведзены зыходзячы з сярэдняй заработнай платы работнікаў у рэспубліцы за IV квартал 2011 года (па дадзеных Нацыянальнага статыстычнага камітэта, яна склала Br2 млн. 543 тыс. 832). Сярэдні памер працоўнай пенсіі па ўзросце ў лютым павялічыцца, па ацэнцы, да Br1 млн. 252 тыс. Варта адзначыць, што памер пенсіі кожнага канкрэтнага пенсіянера залежыць ад індывідуальных параметраў яго стажу працы, велічыні заробку і іншых дадзеных, зафіксаваных у матэрыялах пенсійнай справы, у тым ліку ад наяўнасці права на надбаўкі і павышэнні да пенсіі. Максімальны памер працоўнай пенсіі па ўзросце для непрацуючых пенсіянераў, якія маюць стаж 40 гадоў у жанчын і 45 гадоў у мужчын і пры індывідуальным каэфіцыенце 4,0 і вышэй, дасягнуў з лютага Br1 млн. 879 тыс. 260. У працуючых пенсіянераў, якія маюць стаж 40/45 гадоў і пры індывідуальным каэфіцыенце 1,3 і вышэй, максімальны памер працоўнай пенсіі па ўзросце складае з лютага Br1 млн. 364 тыс. 130.